அகழ்வாராய்ச்சிப் பணியில் ஈடுபடும் கிளேட்டன் ஃபிப்ஸ், அவரது குழுவினர் 2006இல் மூன்று கொம்புகள் கொண்ட ட்ரைசெட்டாப்ஸ் மற்றும் டைரனோசொரஸ் ரெக்ஸ் வகையைச் சேர்ந்த டைனோசரின் எலும்புக்கூட்டையும் தனியாருக்குச் சொந்தமான நிலத்தில் கண்டுபிடித்துள்ளனர்.
இந்த இரண்டு டைனோசர்களும் சண்டையிட்டு உயிரிழந்திருக்கலாம் எனக் கருதப்படுகிறது. டைனோசரின் எலும்புக்கூடுகளுக்கு வணிக ரீதியாக நல்ல விலை கிடைக்கும் என்பதால், அதனை தனியார் நிறுவனங்களுக்கு விற்பனை செய்திட முடிவுசெய்துள்ளனர். ஏனென்றால் முன்பு, டி. ரெக்ஸ் வகையைச் சேர்ந்த டைனோசரின் எலும்புக்கூடு 8 மில்லியனுக்கு விற்பனையாகியுள்ளது.
இதைக் கருத்தில்கொண்டு, இரண்டு எலும்புக்கூடுகளுக்கும் அடிப்படை விலையாக 9 மில்லியனை நிர்ணயம்செய்து 2011இல் ஏலத்தில் வைத்துள்ளனர். ஆனால், யாரும் அதனை அதிக தொகை கொடுத்து ஏலத்தில் எடுத்திட விருப்பம் காட்டவில்லை எனக் கூறப்படுகிறது. பின்னர், 2013இல் மீண்டும் ஏலத்திற்கு விட்டுள்ளனர். அப்போதும், அடிப்படை தொகையைத் தாண்டி ஏலம் எடுத்திட நிறுவனங்கள் முன்வரவில்லை.
இந்நிலையில், இரண்டு எலும்புக்கூடுகளையும் வட கரோலினா இயற்கை அறிவியல் அருங்காட்சியகம் வாங்கியுள்ளது. அவர்கள் அதனை அருங்காட்சியகத்தில் பாதுகாப்பாக வைப்பது மட்டுமின்றி டைனோசர்கள் குறித்து ஆராய்ச்சி நடத்திடவும் திட்டமிட்டுள்ளனர்.
எலும்புக்கூடுகளின் விற்பனை விலை குறித்த அதிகாரப்பூர்வ தகவல் வெளியாகவில்லை. அதே சமயம், 31.8 மில்லியனுக்கு அதிகமான தொகைக்கு விற்பனை செய்யப்பட்டிருக்கலாம் என்ற தகவலும் பரவிவருகிறது. தற்போதைய அறிவியல் வளர்ச்சி, அரிய பொருள்களை ஆய்வுசெய்வதற்கு அதிக முதலீட்டை அளிக்க வழிவகுக்கிறது.
தனியார் நிலத்தில் காணப்படும் புதைபடிவங்களை அமெரிக்கா அதற்கு உரிமை கொண்டாடுவது இல்லை. பெரிய நிலுவைத் தொகையை வழங்கும் நபருக்கு, நில உரிமையாளர் வழங்குவதற்கு அனைத்து உரிமையும் உள்ளன. இந்த விற்பனை, சில சமயங்களில் கள்ளச்சந்தைக்கும் வழிவகுக்கும். பலவிதமான டைனோசர் படிவங்கள், வெளிநாடுகளுக்குத் திருட்டுத்தனமாக கடத்தப்படுவதும் அதிகரித்துவருகிறது.
