'மோசமான குற்றம்'.. கண்ணுகுட்டிக்கு ஜாமீன் வழங்க முடியாது! கள்ளச்சாராய மரண வழக்கில் நீதிமன்றம் திட்டவட்டம்!

கள்ளக்குறிச்சி கள்ளச்சாராயம் விற்பனை செய்து மரணம் ஏற்படுத்தியதாக கைது செய்யப்பட்ட முக்கிய நபர்களான கன்னுக்குட்டி மற்றும் தாமோதரன் ஆகியோரின் ஜாமீன் மனுக்களை தள்ளுபடி செய்து சென்னை உயர் நீதிமன்றம் உத்தரவிட்டுள்ளது.

சென்னை: கடந்த 2024ம் ஆண்டு ஜூன் மாதம் 18ஆம் தேதி கள்ளக்குறிச்சி மாவட்டம் கருணாபுரத்தில் கள்ளச்சாராயம் குடித்ததில் சுமார் 69 பேர் மரணம் அடைந்தனர். பலர் கண்பார்வை பாதிப்புக்கு உள்ளாகினர்.

இந்த வழக்கில் கள்ளச்சாராயம் விற்பனை செய்வது, அவற்றை கடத்தியது உள்ளிட்ட குற்றச்சாட்டுகளில் 21 பேர் கைது செய்யபட்டனர். சி.பி.சி.ஐ.டி விசாரித்து வந்த இந்த வழக்கை சிபிஐக்கு மாற்றி சென்னை உயர் நீதிமன்றம் உத்தரவிட்டது. இதனை உச்ச நீதிமன்றமும் உறுதி செய்தது.

இந்த நிலையில் இந்த வழக்கில் கைது செய்யப்பட்ட முக்கிய நபரான கன்னுக்குட்டி என்ற கோவிந்தராஜ், தாமோதரன், விஜயா, பரமசிவம் ஆகியோர் ஜாமீன் கோரி சென்னை உயர்மன்றத்தில் மனு தாக்கல் செய்தனர்.

'தொடர் குற்றச் செயல்களில் ஈடுபட்டவர்கள்'

இந்த மனு நீதிபதி சுந்தர் மோகன் முன்பு விசாரணைக்கு வந்தது. சிபிஐ தரப்பில் ஆஜரான வழக்கறிஞர் சீனிவாசன், இந்த வழக்கில் முக்கிய நபர்களான தாமோதரன் மற்றும் கன்னுக்குட்டிக்கு ஜாமீன் வழங்கக்கூடாது என எதிர்ப்பு தெரிவித்து வாதிட்டார். சாராய கடத்தல் மற்றும் விற்பனையில் இவர்களுக்கு முக்கிய பங்கு உள்ளது. இவர்களிடம் இருந்து கள்ளச்சாராய மாதிரிகள் பறிமுதல் செய்யப்பட்டு இவர்கள் தான் விற்பனை செய்தது உறுதிப்படுத்தப்பட்டுள்ளது. இவர்கள் மோசமான மற்றும் தொடர் குற்றச் செயல்களில் ஈடுபட்டவர்கள். எனவே, இவர்களுக்கு எந்த விதமான கருணையும் காட்டக்கூடாது. இவர்களுக்கு எதிராக 30 வழக்குகள் நிலுவையில் உள்ளதாகவும் தெரிவித்தார்.

இதையும் படிங்க: "அரசு ஊழியர்களை ஏமாற்றினால் 2026 தேர்தலில் திமுக ஏமாறும்" - ஜாக்டோ ஜியோ எச்சரிக்கை!

மனுதாரர்கள் தரப்பில் ஆஜரான வழக்கறிஞர், கடந்த 8 மாதங்களுக்கு மேல் இவர்கள் சிறையில் உள்ளனர். தாமோதரன் ஒரு மாற்றுத்திறனாளி. விஜயா ஒரு பெண். மேலும் இந்த வழக்கில் தொடர்புடைய சிலருக்கு உயர் நீதிமன்றம் ஜாமீன் வழங்கி இருப்பதாகவும் தெரிவித்தார்.

'ஜாமீன் வழங்க முடியாது'

இதனையடுத்து நீதிபதி, கன்னுக்குட்டி என்ற கோவிந்தராஜ் மற்றும் தாமோதரன் இருவருக்கும் தற்போது ஜாமீன் வழங்க முடியாது என தெரிவித்தார். பின்னர் இருவரின் மனுக்களை திரும்ப பெறுவதாக மனுதாரர் தரப்பில் தெரிவிக்கப்பட்டது. அதனையடுத்து இருவரின் மனுக்களை திரும்ப பெற அனுமதி அளித்த நீதிபதி ஜாமீன் மனுக்களை தள்ளுபடி செய்து உத்தரவிட்டார்.

அதே வேளையில் பரமசிவம், விஜயா இருவருக்கும் நிபந்தனை ஜாமீன் வழங்கி விசாரணைக்கு தேவைப்படும் போது ஆஜராகி விளக்கமளிக்க வேண்டும் என உத்தரவிட்டுள்ளார்.