கோவிட்-19 அச்சம் காரணமாக நாடு முழுவதும் ஊரடங்கு அமல்படுத்தப்பட்டுள்ளதால் அமெரிக்க பொருளாதாரம் கடந்த 10 ஆண்டுகளில் இல்லாத அளவுக்கு 4.8 விழுக்காடு சரிவைச் சந்திக்கும் என்று அந்நாட்டின் அரசு அரசு அறிக்கை சமர்ப்பித்துள்ளது.
"கரோனா பரவலைத் தடுக்க அனைவரையும் வீட்டிலேயே இருக்கும்படி அரசு அறுவுறுத்திருந்தது. இதன் காரணமாக தொழில் துறையினரும் பள்ளி நிர்வாகங்களும் தொலைதூரப் பணிக்கு மாறியுள்ளனர். வாடிக்கையாளர்கள் தங்கள் தேவைகளைக் குறைத்துள்ளனர். தேவையற்ற செலவுகளைக் குறைத்து அத்தியாவசிய தேவைகளுக்கு மட்டும் செலவுகளைச் செய்கின்றனர்" என்று அதில் தெரிவிக்கப்பட்டுள்ளது.
மேலும், "அமெரிக்கா சந்தித்துள்ள இந்தப் பொருளாதார சரிவு என்பது இரண்டாவது காலாண்டில் மிக மோசமாக மாறும். 2019ஆம் ஆண்டின் நான்காவது காலாண்டில் மொத்த உள்நாட்டு உற்பத்தி 2.1 விழுக்காடாக இருந்தது.
2020ஆம் ஆண்டின் முதல் காலாண்டின் மொத்த உள்நாட்டு உற்பத்தி கோவிட்-19 தொற்றால் எவ்வளவு தூரம் பாதிக்கப்பட்டுள்ளது என்பதைக் கண்டறிவது கடினம். பொருளாதார சரிவை ஒட்டுமொத்தமாகவே கண்டறிய முடியும். கரோனா தொற்றால் மட்டும் பொருளாதாரம் எவ்வளவு தூரம் சரிந்துள்ளது என்பதைக் கண்டறிய இயலாது.
தற்போது அமெரிக்கா சந்தித்துள்ள பொருளாதார சரிவுக்கு நுகர்வோர் செலவினங்கள் குறைந்துள்ளதும், முதலீடுகள் குறைந்துள்ளதும் முக்கியக் காரணமாக இருக்கிறது" என்றும் அதில் குறிப்பிடப்பட்டுள்ளது.
முன்னதாக கடந்த வாரம் வெள்ளை மாளிகையின் மூத்த பொருளாதார ஆலோசகர் கெவின் ஹாசெட், இரண்டாம் காலாண்டில் ஜிடிபி மைனஸ் 15 முதல் மைனஸ் 20 விழுக்காடு வரை இருக்கும் என்று எதிர்பார்ப்பதாகத் தெரிவித்திருந்தார்.
அமெரிக்க அதிபர் ட்ரம்ப் செய்தியாளர்களிடம், "ஊரடங்கு தளர்த்தப்பட்டதும் அமெரிக்க பொருளாதாரம் மூன்றாவது காலாண்டில் உயர்வைச் சந்திக்கும். நான்காவது காலாண்டில் பொருளாதார வளர்ச்சி என்பது புது உச்சத்தைத் தொடும். இதன்மூலம் அடுத்த ஆண்டும் சிறந்த பொருளாதார வளர்ச்சியை நம்மால் அடைய முடியும்" என்று நம்பிக்கைத் தெரிவித்தார்.
இதையும் படிங்க: போரைவிட கரோனாவில் அதிகம் - அமெரிக்காவின் துயர நிலை!
