சென்னை: தமிழில் முதன்முறையாக தெலுங்கு நடிகர் ராம் பொத்தினேனி நடிக்கும் 'The Warrior' திரைப்படத்தில் சிலம்பரசன், ஹரிபிரியா பாடிய 'புல்லட்' முதல் சிங்கிள் பாடலை சென்னையில் நேற்று(ஏப். 22) உதயநிதி ஸ்டாலின் வெளியிட்டார். படத்திற்கு தேவிஸ்ரீ பிரசாத் இசையமைத்துள்ளார்.
நீண்ட இடைவெளிக்குப் பிறகு லிங்குசாமி இப்படத்தை இயக்கியுள்ளார். தமிழ், தெலுங்கில் வெளியாகவுள்ள 'தி வாரியர்' படத்தை சீனிவாசா சிந்தூரி தயாரித்துள்ளார். லிங்குசாமி இயக்கத்தில் ராம் பொத்தினேனி நடிக்கும் 'தி வாரியர்' படத்தின் புல்லட் என்ற சிங்கிள் பாடல் வெளியீட்டு விழா சென்னையில் நடைபெற்றது.
சிம்பு, ஹரிபிரியா குரலில்..: இவ்விழாவில் நடிகரும் எம்எல்ஏவுமான உதயநிதி ஸ்டாலின், நடிகர் ராம் பொத்தினேனி, கீர்த்தி ஷெட்டி, விவேகா, தேவிஶ்ரீ பிரசாத், ஆதி, இயக்குநர் லிங்குசாமி உள்ளிட்டோர் கலந்துகொண்டனர். இப்பாடலை நடிகர் சிம்பு மற்றும் ஹரிப்பிரியா இணைந்து பாடியுள்ளனர். இப்பாடலின் பாடலாசிரியர் விவேகா ஆவார்.
உக்ரைனில் போர் நடப்பதால் அங்கு மட்டும்தான் தேவிஶ்ரீ பிரசாத்தின் பாடல்கள் இல்லை. கீர்த்தி ஷெட்டி கூறுகையில், 'தமிழில் எனக்கு பிடித்த படங்களில் ஒன்று 'பையா'. அவரது இயக்கத்தில் நடிப்பது மகிழ்ச்சி. 'உபென்னா' தமிழில் வெளியாகவில்லை. ஆனாலும், தமிழ் ரசிகர்கள் எனக்கு வரவேற்பு அளித்துள்ளனர் நன்றி' என்று கூறினார்
ஆதி கூறுகையில், 'வந்தாரை வாழ வைக்கும் தமிழ்நாடு. ராம் தமிழ் சினிமாவிற்கு உங்களை வரவேற்கிறேன்' என்று கூறினார்.
தேவிஶ்ரீ பிரசாத் கூறுகையில், 'உதயநிதி ஸ்டாலின் அவ்வளவு பெரிய குடும்பத்தில் இருந்து வந்தாலும் மிகவும் அமைதியானவர். இந்த பாடலை நீங்கள் வெளியிட்டதற்கு நன்றி. லிங்குசாமி நன்றாக கவிதை எழுதக்கூடியவர். இந்த கரோனா காலகட்டத்தில் வாரியராக இருந்த முன்களப் பணியாளர்களுக்கு நன்றி. இப்பாடலை பாடிய சிம்புவுக்கு நன்றி' என்று கூறினார்.
லிங்குசாமி கூறுகையில், 'எனது நண்பன் இன்று உயிருடன் இருக்க காரணமானவர் உதயநிதி. நான் அழைத்ததும் உடனே வர ஒப்புக்கொண்டார். எனக்கு நா.முத்துக்குமார் இல்லாத குறையை விவேகா தீர்த்துவைத்துள்ளார். இந்த ஒரு பாடலுக்கு மட்டுமே மூன்று கோடி ரூபாய் செலவு செய்துள்ளனர். பொதுவாக எனக்கு ஷெட்டி என்றாலே பிடிக்கும். இப்பாடலுக்கு பிரபுதேவா நடனம் அமைப்பதாக இருந்தது. அந்த பயத்திலேயே கீர்த்தி நடனம் கற்றுக்கொண்டார்' இவ்வாறு கூறினார்.
'வாரியர்' என்ற பெயர் லிங்குசாமிக்கு பொருந்தும்: உதயநிதி ஸ்டாலின் கூறுகையில், 'இதுபோன்ற ஒரு சினிமா நிகழ்ச்சிக்கு வந்து ரொம்ப நாள்களாகி விட்டது. நேற்றுவரை எனக்கு என்ன நிகழ்ச்சி என்றே தெரியாது. ஒருபடத்தின் லிரிக்கள் வீடியோ இவ்வளவு பெரியதாக வைத்து பார்த்ததில்லை. 'வாரியர்' என்ற பெயர் லிங்குசாமிக்கு பொருந்தும்.
வருங்காலத்தில் எனது தயாரிப்பில் இணைந்து பணியாற்றுவோம். கீர்த்திக்கு தமிழ் தெரியாது என்றார்கள். ஆனால், லோக்கல் பாஷையில் கீர்த்தி பேசுகிறார். பாலா படத்தில் நடிக்கிறார். அவரது பயிற்சிதான்போல. பான் இந்தியா படங்கள் நிறைய வருகிறது. தமிழ் மக்கள் தமிழ் படத்தை ஓட வைக்கிறார்களோ இல்லையோ, நல்ல படங்கள் எந்த மொழியில் வந்தாலும் அதனை ஓட வைக்கிறார்கள்.
அந்த தைரியத்தில் தான் எல்லோரும் பான் இந்தியா படம் என்று தமிழுக்கும் வருகிறார்கள். தமிழ் படங்களை நான் குறை கூறவில்லை.
நல்ல படத்தை கண்டிப்பாக மக்கள் ஓட வைப்பார்கள்' என்றார்.
ராம் பொத்தினேனி கூறுகையில், 'உதயநிதி நீங்கள் தமிழ் மக்களுக்கு செய்த நல்ல விஷயங்கள் ஆந்திரா வரை தெரிகிறது. கீர்த்தி ஒரு குழந்தை மாதிரி இப்பாடலில் செய்துள்ளார். சிறு வயதில் தொடர்ந்து இரண்டு முறை பார்த்து ரசித்த படம் 'ரன்'' என்றார்.
இதையும் படிங்க: 'Video:'யமுனாவும் கட்டிலும்'-பாடல் உருவாக்கத்தில் இயக்குநரை கலாய்த்த கவிப்பேரரசு வைரமுத்து!'
