சென்னை: இயக்குநர் நெல்சன் இயக்கத்தில் நடிகர் ரஜினிகாந்த் நடித்துள்ள ஜெயிலர் திரைப்படம் இன்று திரையரங்குகளில் வெளியானது. சன் பிக்சர்ஸ் கலாநிதி மாறன் தயாரித்துள்ள இப்படத்தில் ரம்யா கிருஷ்ணன், மோகன்லால், சிவராஜ் குமார், வசந்த் ரவி, விநாயகன் உள்ளிட்டோர் நடித்துள்ளனர். ஜெயிலர் படத்திற்கு அனிருத் இசையமைத்துள்ளார்.
ஏற்கனவே ஜெயிலர் படத்தில் காவாலா, ஹுகும், ரத்தமாரே உள்ளிட்ட பாடல்கள் ரசிகர்களிடம் வரவேற்பை பெற்றது. ஹுகும் பாடல் வரிகள் சமூக வலைதளங்களில் ரஜினி - விஜய் ரசிகர்களிடையே யார் சூப்பர் ஸ்டார் என்ற விவாதத்தை உருவாக்கியது. மேலும் ஜெயிலர் படத்தின் ஆடியோ வெளியிட்டு விழாவில் நடிகர் ரஜினி கூறிய காக்கா - பருந்து கதை, நடிகர் விஜய்யை மறைமுகமாக தாக்கி பேசுவது போல் இருந்ததாக ரசிகர்கள் சமூக வலைதளங்களில் எதிர்ப்பு தெரிவித்தனர்.
மேலும் தமிழ்நாட்டின் பல்வேறு பகுதிகளில் ரஜினி ரசிகர்கள் விஜய்க்கு எதிர்ப்பு தெரிவித்து போஸ்டர்கள் ஒட்டினர். இந்நிலையில் ஜெயிலர் திரைப்படம் இன்று வெளியானது. சென்னை உள்ளிட்ட தமிழ்நாட்டின் பல்வேறு பகுதிகளில் ஜெயிலர் படத்தின் சிறப்பு காட்சி இன்று காலை திரையிடப்பட்டது. அண்டை மாநிலங்களான ஆந்திரா, கர்நாடகாவில் ஜெயிலர் படத்தின் சிறப்பு காட்சி இன்று அதிகாலை திரையிடப்பட்டது.
சென்னையில் பிரபலமான ரோகிணி திரையரங்கில் ரஜினி ரசிகர்கள் கொண்டாட்டத்தில் ஈடுபட்டனர். இந்நிலையில் ஜெயிலர் படத்தின் இசையமைப்பாளர் அனிருத் ஜெயிலர் படத்தை வெற்றி திரையரங்கில் ரசிகர்களுடன் பார்த்தார். இயக்குநர் கார்த்திக் சுப்புராஜும் வெற்றி தியேட்டரில் ஜெயிலர் படம் பார்த்தார்.
ஜெயிலர் படம் பார்க்க ரோகிணி தியேட்டர் வந்த பிரபல தொகுப்பாளர் விஜய் சாரதி “நான் ஜெயிலர் படம் பார்ப்பதற்காக ரோகிணி தியேட்டர் வந்துள்ளேன். தலைவர், தலைவர் மாஸ் தான் எவர்கிரீன், யூத்ஃபுல் ஹீரோ. நீங்கள் ஜெயிலர் படம் பாருங்கள் கண்டிப்பாக கொண்டாடுவீர்கள்” என கூறினார்.
ஜெயிலர் படம் பார்க்க ரோகிணி தியேட்டர் வந்த நடிகை கலைராணி பேசுகையில் ”எல்லாரும் இரவு தூங்காமல் ஜெயிலர் படம் பார்க்க மிகவும் ஆவலுடன் உள்ளனர். நான் இந்த படத்தில் நடிக்கவில்லை. ஜெயிலர் படத்தை அனைவரும் கொண்டாட வேண்டும்” என்றார்
ஜெயிலர் படம் பார்க்க ரோகிணி தியேட்டர் வந்த ஹுகும் பாடல் எழுதிய சூப்பர் சுப்புவின் தாயார் “ இந்த படத்தில் ஹுகும் பாடல் எழுதியதற்கு சுப்புவை ரஜினி பாராட்டினார். சிறு வயது முதலே சூப்பர் சுப்பு ரஜினி ரசிகர். எப்போதும் ரஜினியை பற்றியே பேசிக் கொண்டு இருப்பார்” என கூறினார். இந்நிலையில் ஜெயிலர் படத்தின் முதல் பாதி பார்த்து முடித்து நன்றாக இருப்பதாக சமூக வலைதளங்களில் ரசிகர்கள் கருத்து தெரிவித்து வருகின்றனர்.
இதையும் படிங்க: Jailer Movie Release: வெளியானது ’ஜெயிலர்’.... திரையரங்குகளில் அலப்பறை செய்யும் ரஜினி ரசிகர்கள்!!
