ஹைதராபாத்: ராஜமெளலி இயக்கத்தில் ராம்சரண், ஜூனியர் என்டிஆர் நடிப்பில் கடந்த ஆண்டு வெளியான "ஆர்ஆர்ஆர்" திரைப்படம் மிகப்பெரிய வெற்றி பெற்றது. தமிழ், தெலுங்கு, இந்தி, கன்னடம், மலையாளம் ஆகிய மொழிகளில் பான் இந்தியா திரைப்படமாக வெளியான இப்படம் ஆயிரம் கோடி ரூபாய்க்கும் மேல் வசூல் செய்தது. வசூலில் சாதனை செய்த ஆர்ஆர்ஆர், பல சர்வதேச விருதுகளையும் குவித்து வருகிறது.
ஆர்ஆர்ஆர் படத்தில் இடம்பெற்ற 'நாட்டு நாட்டு' பாடலுக்கு கோல்டன் குளோப் விருது கிடைத்தது. இப்பாடலில் ராம்சரண், ஜூனியர் என்டிஆரின் அதிர வைக்கும் நடனத்துடன், கீரவாணி இசையும் அனைவரையும் வெகுவாகக் கவர்ந்தது. அதேபோல், ஹாலிவுட் விமர்சகர்கள் சங்க விருது விழாவில், ஆர்ஆர்ஆர் படத்துக்கு நான்கு விருதுகள் வழங்கப்பட்டன. சிறந்த சர்வதேச படம், சிறந்த ஆக்சன் படம், சிறந்த பாடல், சிறந்த சண்டை ஆகிய பிரிவுகளில் விருதுகள் கிடைத்துள்ளன.
நாட்டு நாட்டு பாடல் ஆஸ்கர் விருது பரிந்துரை பட்டியலிலும் இடம்பெற்றுள்ளது. 'சிறந்த ஒரிஜினல் பாடல்' என்ற பிரிவில் நாட்டு நாட்டு பாடல் பரிந்துரை செய்யப்பட்டுள்ளது. 95வது ஆஸ்கர் விருது வழங்கும் விழா வரும் 12ஆம் தேதி அமெரிக்காவில் லாஸ் ஏஞ்சல்ஸ் நகரில் நடைபெறவுள்ளது. இதில் கலந்து கொள்வதற்காக ஆர்ஆர்ஆர் படக்குழுவினர் அமெரிக்கா சென்றுள்ளனர்.
இந்த நிலையில், ஆஸ்கர் விருது வழங்கும் விழாவில், நாட்டு நாட்டு பாடல் லைவ் நிகழ்ச்சி நடைபெறவுள்ளதாக அறிவிக்கப்பட்டுள்ளது. நாட்டு நாட்டு பாடலைப் பாடிய ராகுல் சிப்லிகஞ்ச், கால பைரவா இருவரும் ஆஸ்கர் விழா மேடையில் நேரடியாக இப்பாடலை பாடவுள்ளதாக ஆஸ்கர் அகாடமி தெரிவித்துள்ளது.
இதையும் படிங்க: நடிகை சமந்தாவுக்கு ரத்த காயம்.. அதிர்ச்சியில் ரசிகர்கள்..
