கோல்டன் குளோப் 2023 (Golden Globe) விருது வழங்கும் விழாவில் ஆர்ஆர்ஆர் படத்தின் நாட்டு நாட்டு பாடல் சிறந்த ஒரிஜினல் பாடலுக்கான விருதை வென்றது. இதை அறிவித்தவுடன் படக்குழுவினர் அடைந்த மகிழ்ச்சிக்கு அளவே இல்லை. நாட்டு நாட்டு பாடலை தெலுங்கின் மூத்த இசையமைப்பாளர் எம்.எம்.கீரவாணி இசையமைத்திருந்தார்.
இந்த விருதை பெற்ற இசையமைப்பாளர் எம்.எம்.கீரவாணி, அவரது மனைவி ஸ்ரீவள்ளி, இயக்குநர் ராஜமௌலி மற்றும் நடிகர்கள் ராம் சரண் மற்றும் ஜூனியர் என்டிஆர் ஆகியோருக்கு அதை அர்ப்பணித்தார். விருதை பெற்ற இசையமைப்பாளர் கீரவாணி, ”இந்த மதிப்புமிக்க விருதுக்கு மிக்க நன்றி, இந்த விருது எஸ்.எஸ்.ராஜமௌலியின் சிந்தனைக்கு உரியது. தொடர்ந்து என் வேலையை நம்பி என்னை ஆதரிக்கும் அவருக்கு நன்றி” என கூறினார்.
ஆர்ஆர்ஆர் படத்தில் ஜூனியர் என்டிஆர், ராம் சரண், அஜய் தேவ்கன், அலியா பட், ஸ்ரேயா, சமுத்திரக்கனி, உள்ளிட்ட பலர் நடித்துள்ளனர். இந்திய புரட்சியாளர்களான அல்லூரி சீதாராம ராஜு, கொமரம் பீம் ஆகிய கதாபாத்திரங்களைக் கொண்டு கற்பனை கலந்து உருவாக்கப்பட்ட படம் ஆகும்.
நாட்டு நாட்டு பாடல் கோல்டன் குளோப் விருது வென்று இந்தியர்களை மகிழ்ச்சியில் ஆழ்த்தினாலும் மற்றொரு புறம் இந்த படம் சிறந்த ஆங்கிலம் அல்லாத பிறமொழிப் படங்களுக்கான விருதை தவற விட்டுள்ளது. ராஜமௌலியின் பிளாக்பஸ்டர் படமான ஆர்ஆர்ஆர் திரைப்படம், ”அர்ஜென்டினா 1985” திரைப்படத்திடம் சிறந்த ஆங்கிலமல்லாத படத்திற்கான விருதை தோற்றது.
இதையும் படிங்க: Golden Globes 2023: கோல்டன் குளோப் விருதை வென்ற ‘Naatu Naatu’ பாடல்
