மத்திய சென்னை மக்களவைத் தொகுதியில் மக்கள் நீதி மய்யம் சார்பில் கமீலா நாசர் போட்டியிடுகிறார். அவருக்கு ஆதரவாக கமீலா நாசரின் கணவரும், நடிகருமான நாசர் அண்ணா நகர் உள்ளிட்ட பகுதிகளில் தேர்தல் பரப்புரையில் ஈடுபட்டார். அப்போது அவர் பேசியதாவது, நான் ஒரு நடிகனாகவோ அல்லது கமீலாவின் கணவனாகவோ இங்கு வரவில்லை. 35 ஆண்டுகளாக கமீலாவோடு பயணித்த உற்ற நண்பனாக இங்கு வந்துள்ளேன். இந்த 35 வருட பழக்கத்தில் அவர்களின் நிர்வாக திறமை, கல்வி, அணுகுமுறை என்ன என்று எனக்கு தெரியும்.
இது பெண்களுக்கான காலம். பெண்கள் வீட்டோடுதான் இருக்க வேண்டும் என்பது கிடையாது. இன்று இந்தியாவில் பெண்கள் விமானம் முதல் ஆட்டோ வரை அனைத்தும் கையாளுகிறார்கள். பெண்களுடைய காலம் என்பதால் ஒரு பெண்களின் பிரதிநிதியாக கமீலாவை நீங்கள் ஆதரிக்க வேண்டும். முக்கியமான விஷயம் என்னவென்றால், இந்தத் தேர்தலில் உங்கள் வீட்டில் உள்ள அனைவரையும் வாக்களிக்கச் சொல்லுங்கள். நம்முடைய முதல் கடமை நூறு விழுக்காடு வாக்குப்பதிவை கொண்டு வரவேண்டும் என்பதே ஆகும். இவ்வாறு அவர் கூறினார்.
