மக்களவைத் தேர்தலில் டிடிவி தினகரனின் அமமுகவுக்கு ஆதரவாக செயல்பட்டதாகக் கூறி இரட்டை இலை சின்னத்தில் வெற்றிபெற்ற கள்ளக்குறிச்சி பிரபு, விருத்தாசலம் கலைச்செல்வன், அறந்தாங்கி ரத்தின சபாபதி ஆகியோர் மீது ‘கட்சித் தாவல் தடைச் சட்டத்தின் கீழ் ஏன் நடவடிக்கை எடுக்கக் கூடாது?’ என விளக்கம் கேட்டு சபாநாயகர் தனபால் நோட்டீஸ் அனுப்பியுள்ளார்.
இந்தத் தகவல்கள் செய்தி ஊடகங்களை ஆட்கொண்டிருந்த பரபரப்பான நேரத்தில், அடுத்த உடனுக்குடன் செய்தியாக சபாநாயகர் மீது நம்பிக்கையில்லாத் தீர்மானம் கொண்டு வருவதற்காக பேரவைச் செயலர் கே.சீனிவாசனிடம் எதிர்க்கட்சித் தலைவர் சார்பில் மனு அளிக்கப்பட்டது.
டிடிவி தினகரனுக்கு ஆதரவாக செயல்பட்டதாகக் கூறி தகுதிநீக்க அஸ்திரத்தை அதிமுக கையில் எடுத்தால், திமுக ஏன் எதிர்வினையாற்றுகிறது என குழப்பங்கள் ஏற்பட்டன. அதைத் தீர்க்க அமமுக வட்டாரத்தில் பேசியபோது, தேர்தல் முடிவுகள் ஒருவேலை சாதகமாக வராத பட்சத்தில், உறுப்பினர்களின் எண்ணிக்கையைக் குறைத்து ஆட்சியை நீட்டிக்கவே தகுதிநீக்க அஸ்திரத்தை அதிமுக கையில் எடுத்தது. அதற்கு செக் வைக்கும் விதமாகவே சபாநாயகர் மீது திமுக நம்பிக்கையில்லா தீர்மானம் கொண்டு வந்திருப்பதாக விவரிக்கின்றனர்.
அதேபோல், அவை பலம் சரிபாதி உறுப்பினர்களின் ஆதரவு திமுகவின் நம்பிக்கையில்லா தீர்மானத்திற்கு கிடைத்தால்தான் தீர்மானம் வெற்றி அடையும். ஆனால், திமுகவுக்கு 97 உறுப்பினர்களின் ஆதரவு மட்டுமே இருப்பதால், தீர்மானம் தோல்வியில் தான் முடியும் என்கிறார் வழக்கறிஞர் தமிழ்மணி.
அடுத்த சட்டப்பேரவைக் கூட்டத்தொடர் வரும் ஜூன் இறுதியிலோ அல்லது ஜூலை தொடக்கத்திலோ ஆளுநர் உரையுடன் தொடங்க வாய்ப்பு உள்ளதால் மே 23ஆம் தேதிக்கு முன்பாக தீர்மானம் கொண்டுவர வாய்ப்புகள் இல்லை.
இடைப்பட்ட காலத்தில் மூன்று எம்எல்ஏக்களிடம் விளக்கம் பெற்று தகுதி நீக்க நடவடிக்கை எடுக்க 18 எம்எல்ஏக்கள் வழக்கில் வழங்கப்பட்ட உயர் நீதிமன்ற உத்தரவின்படி சபாநாயகருக்கு முழு அதிகாரம் உள்ளது.
ஆனாலும், தகுதி நீக்கம் செய்யப்பட்ட 18 எம்எல்ஏக்களுடன் கூட்டணி கட்சி வேட்பாளர் கருணாஸ் மீதும் தகுதி நீக்க நடவடிக்கை எடுக்க சபாநாயகர் உத்தரவிட்டபோது, சபாநாயகர் மீது நம்பிக்கை இல்லா தீர்மானத்தை கொண்டுவரக்கோரி கருணாஸ் மனு அளித்ததால் அவர்மீதான நடவடிக்கை மட்டும் கைவிடப்பட்டது. அதே சூழ்நிலை தற்போதைய நிலைக்கு பொருந்துமா? என்ற கேள்வியும் எழுந்துள்ளது.
அதனால், எந்த கட்சிகளுக்கும் சட்டப்பேரவையில் போதுமான உறுப்பினர்கள் இல்லாததால் 22 சட்டப்பேரவை தொகுதிகளுக்கான இடைத்தேர்தல் முடிவுக்கு பிறகு கட்சிகளின் பலத்தை பொறுத்து தீர்மானத்தின் மீது நடவடிக்கை எடுக்கப்படும் எனத் தெரிகிறது.
அதுவரை, மூன்று எம்எல்ஏக்கள் மீதான நடவடிக்கையை தவிர்க்கவே சபாநாயகர் மீது நம்பிக்கை இல்லா தீர்மானம் என்ற பிரம்மாஸ்திரத்தை திமுக கையில் எடுத்து, சபாநாயகரின் கைகளுக்கு சட்டப்பூட்டு போட்டிருப்பதாக சட்ட வல்லுநர்கள் கருத்து தெரிவிக்கின்றனர்.
