திருச்சி: தமிழ்நாட்டில் லாட்டரிச் சீட்டுத் திட்டம் 1968ஆம் ஆண்டு அறிஞர் அண்ணாவால் அறிமுகப்படுத்தப்பட்டது. விழுந்தால் வீட்டுக்கு, விழாவிட்டால் நாட்டுக்கு என்ற முழக்கத்தோடு செய்தி மற்றும் விளம்பரத் தொடர்புத்துறையின் கீழ் செயல்படுத்தப்பட்ட இந்த லாட்டரிச் சீட்டுத் திட்டத்துக்கு ஆரம்பத்தில் மக்கள் மத்தியில் ஏகோபித்த வரவேற்பு இருந்தாலும் காலப்போக்கில் கடுமையான எதிர்ப்பும் கிளம்பியது.
லாட்டரிச் சீட்டுக்கு அடிமையான ஏழை மக்கள் பலர் தங்கள் அன்றாட வருமானத்தையும், வாழ்நாள் சேமிப்பையும் இழப்பதாகவும் இதனால் பலர் தற்கொலை செய்துகொள்வதாகவும் நாலாபுறமும் குற்றச்சாட்டுகள் எழுந்த வண்ணம் இருந்தன. கிட்டத்தட்ட கால் நூற்றாண்டுக்குப்பின் ஜெயலலிதா அரசால் லாட்டரிச் சீட்டுக்கு தடைவிதிக்கப்பட்டது.
ஆனால், அண்டை மாநிலமான கேரளாவில் லாட்டரிச்சீட்டு விற்பனை இன்றும் கொடிகட்டிப் பறந்து வருகிறது. தமிழ்நாட்டைச் சேர்ந்தவர்கள் கேரள பார்டருக்குச்சென்று லாட்டரிச் சீட்டுக்களை மொத்தமாக வாங்கி வந்து விற்கத் தொடங்கினர். தமிழ்நாடு அரசு தன்னுடைய இரும்புக்கரத்தைக் கொண்டு கடுமையாக்கியதால் லாட்டரிச் சீட்டு விற்பனை சற்றே தணிந்து இருந்தது.
பின்னாளில் சில ஏஜெண்டுகள் வேறுவிதமாக சிந்திக்கத் தொடங்க, கேரளாவில் தினமும் லாட்டரிச் சீட்டு குலுக்கல் நேரடி ஒளிபரப்பு செய்யப்படுகிறது. கேரள தொலைக்காட்சி ஒன்றில் லாட்டரிச் சீட்டின் கடைசி நான்கு இலக்கங்களை மட்டும் கணக்கில் கொண்டு ஏமாற்ற ஆரம்பித்தார்கள், தமிழ்நாட்டு மக்களை. உதாரணமாக 1, 2, 3, 4 என்ற எண்களுக்கு நீங்கள் 150 ரூபாய் பணம் கட்டி, அந்த நான்கு இலக்கங்களும் சரியாக இருந்தால் 1 லட்சம் ரூபாய், கடைசி மூன்று இலக்கங்கள் ஒத்துப்போனால் 25,000 ரூபாய், கடைசி இரண்டு இலக்கங்கள் ஒத்துப்போனால் 1,000 ரூபாய், ஒரே ஒரு இலக்கம் மட்டும் ஒத்துப்போனால் 100 ரூபாய் கிடைக்கும் என அறிவித்தார்கள்.
நல்ல வரவேற்பு, ஆனால் இதற்கும் கேரள அரசுக்கும் எந்தவிதத் தொடர்பும் இல்லை. லாட்டரிச்சீட்டு காவலர்கள் முதல் கட்டுமான மேஸ்திரி, ஆட்டோ டிரைவர் என பலரையும் காவு வாங்க ஆரம்பித்தது. இப்போது கேரள அரசாங்கமே ஆன்லைனில் லாட்டரி விற்கத்தொடங்கிவிட்டது என்கிறார்கள், சமூக ஆர்வலர்கள்.
தமிழ்நாட்டில் டாஸ்மாக் கடைகளால் லட்சக்கணக்கான ஏழை, எளிய குடும்பங்கள் பாதிக்கப்படுகின்றன. எனவே, வருமானத்தைப் பற்றி சிந்திக்காமல் மக்கள் நலனைக்கருத்தில் கொண்டு டாஸ்மாக் கடைகளை மூட வேண்டும் என்ற கோரிக்கை நீண்ட நாள்களாகவே தொடர்ந்து வருகிறது. இந்நிலையில் ஆன்லைன் லாட்டரி விற்பனை தலைதூக்க ஆரம்பித்துவிட்டது.
காங்கிரஸ் நாடாளுமன்ற உறுப்பினர் கார்த்திக் சிதம்பரம் வரைமுறைகளுடன் லாட்டரிச் சீட்டை தமிழ்நாடு அரசே மீண்டும் நடத்த வேண்டும் எனவும்; பல வெளிநாடுகளில் லாட்டரிச்சீட்டு விற்பனையில் இருக்கிறது என்றும் கூறுகிறார்.
பாமகவின் நிறுவனர் ராமதாஸோ லாட்டரிச் சீட்டு எந்த விதத்திலும் தமிழ்நாட்டில் வரவே கூடாது என்கிறார். கரோனா காலத்தில் வீட்டுக்கு வீடு ஆண்ட்ராய்டு போன் அட்டகாசமான இடத்தைப் பிடித்துவிட்டது. இன்டர்நெட்டும் அளவில்லாமல் கிடைக்கிறது. அப்புறம் கேட்கவா வேண்டும். தமிழ்நாடு அரசு என்ன செய்யப்போகிறது. ஏற்கெனவே டாஸ்மாக்... இப்போது ஆன்லைன் லாட்டரியா?.
இதையும் படிங்க: ஆன்லைன் ரம்மியில் ரூ.2 லட்சம் இழந்த இளைஞர் தற்கொலை
