சேலம்: நாமக்கல் மாவட்டம் வையப்பமலையைச் சேர்ந்தவர் ஆராயி (65). இவர், தனது மகள் ரேவதி (47) உடன் சேலம் பழைய பேருந்து நிலையத்திற்கு வந்தார். தங்களது ஊருக்கு செல்ல பேருந்தில் ஏறி இருவரும் அமர்ந்தபோது, அங்கு வந்த ரேவதியின் கணவர் இயேசுதாஸ், ரேவதி மீது ஆசிட் ஊற்றி விட்டு தப்பிச்சென்றார்.
இதில், ரேவதி படுகாயமடைந்தார். இதனைக் கண்ட ரேவதியின் தாயார் ஆராயி, அலறியடித்தபடி கதறி அழுதார். உடனடியாக அருகில் இருந்தவர்கள் இருவரையும் மீட்டு சிகிச்சைக்காக சேலம் அரசு தலைமை மருத்துவமனைக்கு அனுப்பி வைத்தனர்.
இதுகுறித்து தகவலறிந்த சேலம் டவுன் காவல் துறையினர், மருத்துவமனையில் அனுமதிக்கப்பட்டுள்ள ரேவதி, ஆராயி ஆகியோரிடம் விசாரணை நடத்தினர்.
பிரிந்து வாழ முடிவு
அப்போது ஆராயி கூறுகையில், "சேலம் குகை பகுதியைச் சேர்ந்தவர் இயேசுதாஸ். இவருக்கும் எனது மகளுக்கும், இயேசுதாஸுக்கும் திருமணமாகி 22 வருடங்கள் ஆகின்றது. இவர்களுக்கு மூன்று பிள்ளைகள் உள்ளனர்.
இருவருக்கும், அடிக்கடி தகராறு ஏற்பட்டு வந்ததால் பிரிந்து வாழ முடிவு செய்தனர். இதனையடுத்து இன்று (ஆக.30) சேலத்தில் வழக்கறிஞர் ஒருவர் முன்னிலையில் பேச்சுவார்த்தை நடத்தி இருவரும் பிரிந்து செல்ல முடிவெடுத்தனர் .
கணவருக்கு போலீஸ் வலை
இதில், ஆத்திரமடைந்த இயேசுதாஸ் நாங்கள் ஊருக்குச் செல்வதை அறிந்து, பின் தொடர்ந்து வந்துள்ளார். பின்னர், பேருந்தில் அமர்ந்திருக்கும்போது ஐந்து லிட்டர் கேனில் ஆசிட்டை எடுத்து வந்து ரேவதி மீது ஊற்றி விட்டு தப்பி விட்டார்" எனத் தெரிவித்தார்.
இச்சம்பவம் குறித்து வழக்குப்பதிவு செய்த காவல் துறையினர், ரேவதி மீது ஆசிட் ஊற்றிய இயேசுதாஸை தீவிரமாக தேடி வருகின்றனர்.
இதையும் படிங்க: ஒரு பெண்ணை இருவர் காதலித்த தகராறில் இளைஞர் வெட்டிக் கொலை
