ராமநாதபுரம் கீழக்கரை பகுதியைச் சேர்ந்த சரவணன் உயர்நீதிமன்ற மதுரைக்கிளையில் பொதுநல மனு ஒன்றைத் தாக்கல் செய்திருந்தார்.
அதில், "ராமநாதபுரம் மாவட்டம் கீழக்கரை, ரகுநாதபுரம் கிராமத்தில் பெரிய ஊரணி அமைந்துள்ளது. இந்த ஊரணி, அருகில் உள்ள பல கிராமங்களுக்கு நீர் ஆதாரமாக திகழ்ந்து வருகிறது. இந்தப் பகுதியில் மூன்று ஏக்கர் நிலங்களை ஆக்கிரமிப்பு செய்து 10 இடங்களில் மிக ஆழமாக துளையிட்டு ONGC நிறுவனம், அப்பகுதியில் கேஸ் எடுப்பதற்கான வேலைகளை நடத்திவருகிறது.
பெரிய ஊரணி பகுதியில் ஓஎன்ஜிசி கேஸ் நிறுவனம் சார்பாக சுற்றுச்சுவர் அமைக்கப்பட்டுள்ளது. இந்தக் கேஸ் நிறுவன பகுதியிலிருந்து குடியிருப்புப் பகுதி 25 மீட்டர் தூரத்தில் அமைந்திருக்கிறது. எனவே தீ விபத்து ஏற்படும் பொழுது பொதுமக்களுக்கு மிகப் பெரிய பாதிப்பு ஏற்பட வாய்ப்புள்ளது. மேலும் கேஸ் எடுக்கும்போது வெளிப்படும் கழிவு நீர் ஊரணி வழியாக கிராமத்திற்கு வருவதற்கான வாய்ப்புகள் உள்ளன.
எனவே பொதுமக்களுக்கு அச்சுறுத்தல் ஏற்படுத்தும் விதமாகவும், நீர் ஆதாரமாக இருக்கும் ஊரணியை ஆக்கிரமிப்பு செய்துவரும் ஒஎன்ஜிசி கேஸ் நிறுவனம், அதன் துணை நிறுவனம் இப்பகுதியில் செயல்பட இடைக்காலத் தடை விதிக்கப்பட வேண்டும். மேலும் குடியிருப்புப் பகுதி அருகே இருப்பதாலும் நீர்நிலைகளை ஆக்கிரமிப்பு செய்திருப்பதால் ஒஎன்ஜிசி கேஸ் நிறுவனம், அதன் துணை நிறுவனங்களை அப்பகுதியில் இருந்து அகற்ற உரிய உத்தரவு பிறப்பிக்க வேண்டும்" என அந்த மனுவில் கூறியிருந்தார்.
இந்த மனு நீதிபதிகள் எம்.எம்.சுந்தரேஷ், ஆனந்தி அமர்வு முன்பு இன்று (பிப். 03) விசாரணைக்கு வந்தது. அப்போது நீதிபதிகள், வழக்கு குறித்து ராமநாதபுரம் மாவட்ட ஆட்சியர் பதில் மனு தாக்கல் செய்ய உத்தரவிட்டு வழக்கு விசாரணையை 2 வாரத்திற்கு ஒத்தி வைத்தனர்.
இதையும் படிங்க: சூரப்பா மீதான விசாரணைக் குழுவிற்கு காலநீட்டிப்பு கேட்கத் திட்டம்
