உலகப் புகழ் பெற்ற அலங்காநல்லூர் ஜல்லிக்கட்டுத் திருவிழா நெருங்கிக் கொண்டிருக்கும் வேளையில், மதுரையின் கிராமப் புறங்களிலுள்ள காளைகள் கொஞ்சம் கொஞ்சமாய் தயாராகிக் கொண்டிருக்கின்றன. ஜல்லிக்கட்டைக் காண இந்த முறை இந்தியப் பிரதமர் மோடியும் வருகிறார் என்பது அரசல்புரசலான தகவலாக இருந்தாலும்கூட, மதுரை மாவட்டம் இன்னும் 50 நாட்களில் விழாக்கோலம் காணவிருக்கிறது என்பது யாரும் மறுக்க முடியாத உண்மை.
மதுரை மாவட்டம் சத்திரப்பட்டி ஊராட்சி ஒன்றியத்திற்கு அருகேயுள்ள கல்லம்பட்டி. பெயர்ப்பலகைக் கூட இல்லாத இந்த சிற்றூரில் அதிகபட்சம் 50 வீடுகள் இருப்பதே அதிசயம்தான். ஒதுக்குப்புறமான குக்கிராமம். அந்தக் கிராமத்திலும் மிக ஒதுக்குப்புறமாக உள்ளது அந்த வீடு.
பசுமை சூழ்ந்த அந்த வெளியில் 'கருப்பன்' மேய்ந்து கொண்டிருந்தார். அந்நியர்களை பார்த்தவுடன் அப்படியொரு செறுமல். அப்போது வீட்டிலிருந்து ஓடி வந்த கனிமொழி, வேக வேகமாய் கருப்பன் காளையை பிடித்து இழுத்து மேய்ச்சலுக்கு அழைத்துச் சென்றார். மற்றொரு காளை, கயிற்றால் பிணைத்துக் கட்டப்பட்டிருந்தது. இருந்தாலும், தனது முன்னங்கால்களால் தரையைப் பெயர்த்து, கொம்புகளால் தூர்த்துக் கொண்டிருந்த காட்சி பயத்தை வரவழைத்தது.
தான் ஆங்கில இலக்கியம் படித்துள்ளதாகவும் எங்களது வீட்டின் மூத்த பிள்ளைகள் காளைகள்தான் என்றும் சிறுவயதிலிருந்தே அவர்களை சுற்றியே தனது நட்பும் சுற்றமும் என்று பேசிய கனிமொழியிடம் இன்னொரு காளையின் வீரம் அப்படியே ஒத்திருந்தது.
தற்போது அவர்களது வீட்டில் நான்கு காளைகளை வளர்த்துவருகிறார் கனிமொழி. காலையில் எழுந்ததும் காளைகளை நடைபயிற்சி, மேய்ச்சலுக்கு அழைத்துச் செல்வது, வீட்டிற்கு வந்தவுடன் நெல்லிக்காய், கடலை மிட்டாய், பருத்திக் கொட்டை உள்ளிட்ட ஊட்டச்சத்து உணவுகள் வழங்குவது, குளிக்க வைப்பது எல்லாம் அவருடைய பணிகள்தான். தான் வளர்த்த ஜோதிகா எனும் செவலைக்காளை கடந்த நான்காண்டுகளுக்கு முன்பு இறந்து போனதாகச் சொல்லும் கனிமொழி, வீட்டிற்குப் பக்கத்திலேயே அந்ந்த காளையை அடக்கம் செய்து, நாள்தோறும் மாலை வேளையில் விளக்கேற்றி வழிபடுவதை வழக்கமாகக் கொண்டுள்ளார் என்பது குறிப்பிடத்தக்கது.
கனிமொழியின் தந்தை ராஜா கூறுகையில், ' மாட்டை வாங்கிவருவதுதான் எங்கள் வேலை. ஆனால் அதனை உரிய முறையில் பராமரிப்பது கனிமொழிதான். இதை வளர்ப்பதால் எந்தவித வருமானமும் இல்லை என்றாலும் கனிமொழிக்காகதான் இந்தக் காளைகளை தொடர்ந்து வளர்க்க வேண்டும் என்ற உந்துதல் வருகிறது. கனிமொழிக்கு எந்த மாடு பிடிக்கிறதோ அதைத்தான் வாங்கி வருவது தனது வழக்கம். இங்குள்ள சில காளைகளை நான் பிடிக்க முடியாது. ஆனால் கனிமொழி மிக லாவகமாக பிடித்துக் கொண்டு வருவார். காளைகள் அனைத்தும் கனிமொழியின் குரலுக்குக் கட்டுப்பட்டவை' என்றார்.
தன் கையோடு வைத்திருந்த கடலை மிட்டாய்களை காளைகளுக்கு ஊட்டி விட்டு, அவற்றை செல்லமாகத் தடவிக் கொடுக்கும் கனிமொழி தன் தலையோடு காளையின் தலையையும் முட்டிக் கொஞ்சிக் குலாவுகிறார். மந்திரத்துக்கு கட்டுப்பட்டவை போன்று கனிமொழியின் கருணைக்கு மயங்கிக் கிடக்கின்றன அனைத்து காளைகளும்.
பிரபல மாடுபிடி வீரர் தீபக் கூறுகையில், 'என்னுடைய அண்ணன் மகள்தான் கனிமொழி. பட்டப்படிப்பு படித்த பெண் என்றாலும்கூட, காளைகளை வளர்ப்பதில் அத்தனை ஆர்வம். இவர்களுக்குத் தருகின்ற நொறுக்குத் தீனிகளைக் கூட காளைகளுக்கு கொடுத்துவிட்டு கனிவோடு வளர்ப்பவர்தான் கனிமொழி. நமது மரபுகளையும், கலாசாரங்களையும் காக்க வேண்டுமானால், ஒவ்வொரு குடும்பமும் காளைகளை, குறிப்பாக நாட்டு மாடுகளை வளர்க்க முன் வர வேண்டும். கனிமொழிக்கு திருமணம் செய்து கொடுத்தால்கூட சீராக இந்தக் காளைகளைத்தான் வழங்குவோம். ' என்றார்.
விவசாயம் சார்ந்த கிராமத்து வாழ்க்கையை விட்டுவிட்டு, நகர்ப்புற ஒண்டிக்குடித்தன வாழ்க்கைக்கு புற்றீசலாய்ப் பறந்து வரும் நபர்களுக்கு மத்தியில், ஜல்லிக்கட்டு காளை வளர்ப்பிலும், விவசாயம் சார்ந்த வாழ்க்கையிலும் அக்கறை செலுத்தி வாழ்ந்து வரும் கனிமொழி பி.ஏ., வியப்பிற்குரியவர்தானே...
இதையும் படிங்க:
100 களங்களைப் பார்த்த ஜல்லிக்கட்டுக் காளை மரணம்: பொதுமக்கள் இறுதிச் சடங்கு!
