ஈரோடு: சத்தியமங்கலம் புலிகள் காப்பகம், கடம்பூர் மலைப்பகுதி அடர்ந்த வனப்பகுதியில் உள்ள அரிகியம் கிராமத்தில் சர்க்கரை மாதேஸ்வரன் கோயில் குண்டம் விழா கடந்த 22ஆம் தேதி பூச்சாட்டுதலுடன் தொடங்கியது. அதனைத் தொடர்ந்து மாதேஸ்வரனுக்கு சிறப்பு அலங்கார பூஜையும் கோயிலில் காப்பு கட்டி வரம் கேட்டல் நிகழ்ச்சியும் நடைபெற்றது.
விழாவையொட்டி கோயில் முன் இன்று (மே 25) குண்டம் இறங்குதல் நிகழ்ச்சி நடைபெற்றது. முதலில் பூசாரி குண்டம் இறங்கி நிகழ்ச்சி தொடங்கி வைத்தார். அதனைத் தொடர்ந்து ஆயிரக்கணக்கான பழங்குடியினர் குண்டம் இறங்கி நேர்த்திக்கடன் செலுத்தினர். குண்டம் இறங்குதல் நிகழ்ச்சிக்கு பின் பாரம்பரிய நிகழ்ச்சியான கெட்டது விலகி, நல்லது நடக்கும் என பாரம்பரிய இசை நிகழ்ச்சி நடைபெற்றது.
பூசாரி பாரம்பரிய இசைக்கருவியை இசைத்து வனவிலங்குகளிடமிருந்து மக்களை பாதுகாக்கவும் விவசாயம் செழிக்கவும் ஊர்மக்கள் நலமுடன் வாழவும் அம்மனிடம் வேண்டுதல் வைக்க, அதனை மற்றொருவர் ஆமோதித்தும் நடந்த நிகழ்ச்சி பக்தர்களை வெகுவாக கவர்ந்தது. அடர்ந்த காட்டுப்பகுதியில் விழா நடந்ததால் கோயிலுக்கு செல்லும் பக்தர்களுக்கு வனத்துறையினர் பாதுகாப்பு ஏற்பாடுகள் செய்திருந்தனர்.
இதையும் படிங்க: இறந்தவர்களின் ஆவியை வீட்டிற்கு அழைத்து வரும் வினோத விழா
