கர்நாடக மாநிலம் சாம்ராஜ்நகர் மாவட்டத்தில் உள்ள பந்திப்பூர் புலிகள் காப்பத்திற்குட்பட்ட சவுதஹள்ளி கிராமத்தில் 15க்கும் மேற்பட்ட கால்நடைகளையும், தோட்டத்தில் பணிபுரிந்த சிவலிங்கப்பா, சிவமாதப்பா ஆகிய இருவரையும் புலி தாக்கியது. இதனைத் தொடர்ந்து, ஆட்கொல்லி புலியைப் பிடிக்க வேண்டும் என கிராமமக்கள் கோரிக்கை விடுத்து போராட்டம் நடத்தி வந்தனர்.
இதையடுத்து, வனப்பகுதிகளில் சுமார் 140 தானியங்கி கேமராக்கள் பொருத்தப்பட்டும், இரண்டு டிரோன் கேமராவையும் பயன்படுத்தியும் புலியை தேடிவந்தனர். பின்னர் வனத்துறையினர் ஆறு கும்கியானைகள், கால்நடை மருத்துவ குழுவினருடன் வனப்பகுதிக்குள் புலியை பிடிக்கச் சென்றனர். புலிகள் வாழ்க்கை முறைகள் குறித்த நிபுணர்கள், ஆய்வாளர்கள் வரவழைக்கப்பட்டு கால்தடம், நடமாட்டம் போன்றவற்றைத் தொடர்ந்து கண்காணித்து வந்தனர்.
இந்நிலையில் நேற்று குண்டல்பேட் தாலுகாவிற்கு உட்பட்ட மகுநவள்ளி என்ற கிராமத்தில் உள்ள விவசாய தோட்டத்தில் புலி பதுங்கி இருப்பது தெரியவந்தது. அங்கு சென்ற கால்நடைதுறை மருத்துவர்கள் நீண்ட நேர போராட்டத்திக்கு பிறகு மயக்க ஊசி செலுத்தி புலியை பிடித்தனர்.
புலி பிடிபட்ட தகவல் வேகமாக பரவியதால் புலியை பார்க்க ஆயிரத்திற்கும் மேற்பட்ட பொதுமக்கள் திரண்டு வந்தனர். பிடிபட்ட ஆண் புலிக்கு சுமார் 7 வயது இருக்கும் என மருத்துவர்கள் தெரிவித்தனர். அதன்பின், பிடிபட்ட புலியை மைசூர் மிருகக்காட்சி சாலைக்கு கொண்டுச்சென்றனர். மேலும் ஆட்களை கொன்று வந்த 'ஆட்கொல்லி புலி' பிடிபட்டதால் சவுதஹள்ளி கிராமமக்கள் மகிழ்ச்சியடைந்துள்ளனர்.
இதையும் படிங்க: சாலையில் ஹாயாக நடந்துசென்ற நான்கு புலிகள்!
