கரோனா வைரஸ் (தீநுண்மி) பாதிப்பு ஏற்பட்டவர்களுக்கு முதலமைச்சரின் விரிவான மருத்துவக் காப்பீட்டுத் திட்டத்தின்கீழ் சிகிச்சை அளிக்கப்படும் என மக்கள் நல்வாழ்வுத் துறை அறிவித்துள்ளது. அதனைத் தொடர்ந்து தனியார் மருத்துவமனைகளில் கரோனா சிகிச்சைக்கான கட்டணத்தை நிர்ணயம் செய்தும் அரசு உத்தரவிட்டுள்ளது.
இந்நிலையில், சென்னையில் 26 தனியார் மருத்துவமனைகளுக்கு கரோனா சிகிச்சையளிக்க அனுமதி வழங்கப்பட்டுள்ளது. அவற்றில் முக்கிய மருத்துவமனைகளான மியாட், அப்போலோ, காவேரி, பில்ரோத் ஆகியவற்றில் கரோனா சிகிச்சைக்காக ஒதுக்கப்பட்ட அனைத்துப் படுக்கைகளும் நிரம்பியுள்ளன.
ஆனால், கற்பக விநாயகா மருத்துவக் கல்லூரி, ஏசிஎஸ் மருத்துவக் கல்லூரி மருத்துவமனை, குளோபல் மருத்துவமனை, ஸ்ரீபாலாஜி மருத்துவக் கல்லூரி மருத்துவமனை, ஸ்ரீ சத்ய சாய் மருத்துவக் கல்லூரி மற்றும் ஆராய்ச்சி நிறுவனம் ஆகியவற்றில் இதுவரை ஒரு நோயாளிகூட சேராமல் உள்ளனர்.
இதனையடுத்து, பொதுமக்களுக்கு மக்கள் நல்வாழ்வு மற்றும் குடும்பநலத் துறை அறிவுறுத்தலை வழங்கியுள்ளது. அதில், தனியார் மருத்துவமனைகளில் படுக்கைகள் காலியாக உள்ளதா? என்பது குறித்து உறுதிசெய்த பின்னர் சிகிச்சைக்குச் செல்லுமாறு கேட்டுக்கொள்ளப்பட்டுள்ளது.
மேலும், மருத்துவமனைகளில் எத்தனை படுக்கைகள், வென்டிலேட்டர்கள காலியாக உள்ளன என்ற விவரத்தையும் மக்கள் நல்வாழ்வு மற்றும் குடும்பநலத் துறை வெளியிட்டுள்ளது. (https://stopcorona.tn.gov.in/)
கரோனா சிகிச்சை மேற்கொள்வதற்கான சென்னை மருத்துவமனைகளின் பட்டியல் மட்டுமே தற்போது வரை வெளியிடப்பட்டுள்ளது. பிற மாவட்டங்களின் பட்டியல் எதுவும் வெளியிடப்படவில்லை என்பது குறிப்பிடத்தக்கது.
இதையும் படிங்க: மருத்துவமனையில் டெல்லி வாழ் மக்களுக்கு மட்டுமே அனுமதி!
