சென்னை: அரசுப் பள்ளிகளில் பயிலும் ஆங்கிலம் படிப்பதில் எழுதுவதில் தனியார் பள்ளி மாணவர்களுக்கு இணையாக இல்லை என்கிற கருத்து பரவலாக முன்வைக்கப்படுகிறது. ஆங்கிலத்தில் பின்தங்கும் மாணவர்கள் உயர்கல்வி மற்றும் வேலை வாய்ப்புகளுக்கு செல்லுகின்ற போது மிகவும் சிரமப்படுகின்றனர்.
இது ஒருவித தாழ்வு மனப்பான்மையை அரசு பள்ளிகளில் படித்த மாணவர்களுக்கு ஏற்படுத்துகிறது. இதனை ஆரம்ப நிலை வகுப்புகளில் இருந்தே சரி செய்யும் வகையில் பள்ளிக் கல்வித்துறை புதிய திட்டம் ஒன்றை வகுத்துள்ளது. அதனடிப்படையில் 4 முதல் 9 ஆம் வகுப்பு வரை உள்ள அரசு பள்ளி மாணவர்களுக்கு, ஆங்கில பயிற்சி அளிக்க பள்ளிக் கல்வித்துறை முடிவெடுத்துள்ளது.
இதுதொடர்பாக மாநிலக் கல்வியியல் ஆராய்ச்சி மற்றும் பயிற்சி நிறுவனம் மாவட்ட முதன்மைக் கல்வி அலுவலர்களுக்கு சுற்றறிக்கை ஒன்றை அனுப்பியுள்ளது. அதில் "அரசு ஆசிரியர் பயிற்சி நிறுவனத்தில் பணிபுரியும் ஆங்கில ஆசிரியர், பட்டதாரி ஆங்கில ஆசிரியர், முதுகலை பட்டதாரி ஆங்கில ஆசிரியர் உள்ளிட்டவர்களை மாவட்ட முதன்மைக் கல்வி அலுவலர் மற்றும் மாவட்ட கல்வி அலுவலர் ஆகியோர் தேர்வு செய்ய வேண்டும்.
அவ்வாறு தேர்வு செய்யப்படும் ஆசிரியர்களுக்கு ஆன்லைனில் அவர்களின் ஆங்கில திறன் மற்றும் திறமை குறித்து அரை மணி நேரம் தேர்வு நடத்தப்படும். அந்த தேர்வில் தேர்ச்சி பெறும் ஆசிரியர்கள் மாவட்ட அளவில் 4 முதல் 9 ஆம் வகுப்பு வரை ஆங்கில பயிற்சிக்கு உரிய ஒருங்கிணைப்பாளராக நியமிக்கப்படுவார்கள்.
இதைத் தொடர்ந்து மாணவர்களுக்கு பயிற்சி வகுப்புகள் வரும் 30, 31ஆம் தேதி தொடங்கும்" எனத் தெரிவிக்கப்பட்டுள்ளது. முன்னதாக, ஆந்திர முதலமைச்சர் ஜெகன்மோகன் ரெட்டியுடன் அந்த மாநிலத்தில் உள்ள அரசு பள்ளிகளை சேர்ந்த மாணவர்கள் சரளமாக ஆங்கிலத்தில் பேசுகின்ற காணொளிகள் சமூக வலைதளங்களில் வெளியாகியது. இதற்கு அம்மாநில பள்ளிக்கல்வித்துறையின் ஆங்கிலப் பேச்சுப் பயிற்சி திட்டமே காரணம் என்று தெரிவிக்கப்பட்டிருந்து. இந்த நிலையில் தமிழ்நாட்டிலும் அரசு பள்ளி மாணவர்களுக்கு ஆங்கில பயிற்சி அளிக்கப்பட உள்ளது குறிப்பிடத்தக்கது.
இதையும் படிங்க: TNPSC தேர்வில் இடம்பெற்ற "ஒன்றியம்" வார்த்தை
