சென்னை: பல்லாவரம் அடுத்த பம்மல் பிரதான சாலையில் 20 ஆண்டுகளாக நகைக்கடை நடத்திவருபவர் கமலேஷ் ஜெயின் (37). கடந்த மாதம் 30ஆம் தேதி இவரது கடைக்கு நகை வாங்குவதற்காக ஒருவர் வந்துள்ளார். அப்போது கமலேஷ், அவரிடம் 30 சவரன் மதிப்புள்ள தங்க செயின்களைக் காட்டிக்கொண்டிருந்தார்.
அப்போது திடீரென கண்ணிமைக்கும் நேரத்தில் அந்நபர், நகைகளுடன் சாலையில் ஓடிச் சென்று அங்குத் தயாராக நின்றிருந்த, அவரது நண்பனின் இருசக்கர வாகனத்தில் ஏறி தப்பிச் சென்றார். இது குறித்து சங்கர் நகர் காவல் நிலையத்தில் கமலேஷ் புகார் செய்தார்.
புகாரின்பேரில் வழக்குப்பதிவு செய்த காவல் துறையினர், கண்காணிப்புக் கேமராவில் பதிவான காட்சிகளை ஆய்வுசெய்தனர். அதில், கொள்ளையர்கள் தப்பிச் சென்ற இருசக்கர வாகனத்தின் நம்பர் தெளிவாகப் பதிவாகி இருந்தது. அதன் அடிப்படையில் காவல் துறையினர் விசாரணையைத் தொடங்கினர்.
அடகுக் கடையில் இருந்த திருட்டு நகை மீட்பு
விசாரணையில் கொள்ளைச் சம்பவத்தில் பயன்படுத்திய வாகனம் திருவண்ணாமலை மாவட்டம் வந்தவாசியைச் சேர்ந்த வினோத் (32) என்பது தெரியவந்தது. உடனே வந்தவாசிக்கு விரைந்த சங்கர் நகர் குற்றப்பிரிவு காவல் துறையினர், அங்கு வீட்டில் இருந்த வினோத்தை கைதுசெய்து, சங்கர் நகர் காவல் நிலையம் அழைத்துவந்து விசாரணை நடத்தினர்.
அப்போது, அவரது நண்பர்களான கடலூரைச் சேர்ந்த ஃபிரான்சிஸ் சேவியர் (24), லோகேஷ் ஆகியோருடன் சேர்ந்து இந்தக் கொள்ளைச் சம்பவத்தில் ஈடுபட்டதாகத் தெரிவித்தனர். அதனடிப்படையில் கடலூர் சென்ற காவல் துறையினர், அங்கு ஃபிரான்சிஸ் சேவியரை கைதுசெய்தனர்.
அவரிடம் நடத்திய விசாரணையில், திருட்டு நகைகளை வந்தவாசி பகுதியைச் சேர்ந்த தினேஷ் (31) என்பவரிடம் நகை அடகுக் கடையில் விற்று பணம் வாங்கியதாகத் தெரிவித்தனர்.
குற்றவாளிகளுக்குச் சிறை
அதன்பிறகு அடகுக் கடையில் இருந்து தங்க செயின் பறிமுதல்செய்யப்பட்டது. இருவரிடமும் நடத்திய விசாரணையில் வட்டிக்கு கடன் வாங்கி, அதைக் கட்ட முடியாததால் இந்தத் திருட்டுச் சம்பவத்தில் ஈடுபட்டதாகத் தெரிவித்தனர்.
இதையடுத்து, இரண்டு பேர் மீதும் வழக்குப்பதிவு செய்த காவல் துறையினர், அவர்களை தாம்பரம் நீதிமன்றத்தில் முன்னிறுத்தி புழல் சிறையில் அடைத்தனர். இந்தத் திருட்டு வழக்கில் தலைமறைவாகவுள்ள மற்றொரு குற்றவாளியான லோகேஷை காவல் துறையினர் வலைவீசி தேடிவருகின்றனர்.
இதையும் படிங்க: குழந்தைகளை வைத்து ஆபாசப் படங்கள் - குற்றவாளிகளுக்கு வலைவீசும் சிபிஐ
