சென்னை டிபி சத்திரம் பகுதியைச் சேர்ந்த 17 வயதுடைய பள்ளி மாணவி. சென்னை அண்ணா நகரில் உள்ள தனியார் பள்ளியில் 12ஆம் வகுப்பு படித்து வருகிறார். இவர் ஜனவரி 27ஆம் தேதி காலை பள்ளிக்கு சென்று மாலையில் வீடு திரும்பவில்லை. நேற்றும் இவர் வீடு திரும்பாத காரணத்தால் பெற்றோர்கள் டிபி சத்திரம் காவல் நிலையத்தில் புகார் அளித்தனர்.
இந்த நிலையில் நேற்று(28-01-2020) மாலை கீழ்ப்பாக்கம் அனைத்து மகளிர் காவல் நிலையத்தில் காணாமல் போன பள்ளி மாணவி, டிபி சத்திரம் பகுதியைச் சேர்ந்த சத்யா என்பவர் (32) தன்னை திருமணம் செய்துகொள்வதாகச் சொல்லி ஏமாற்றி விட்டதாக புகார் அளித்தார்.
அதனடிப்படையில் வழக்குப்பதிவு செய்த போலீசார், சத்யாவை காவல் நிலையம் அழைத்து வந்து விசாரணை செய்தனர். விசாரணையில் சத்யா, டிபி சத்திரம் 102ஆவது பகுதி பாமக வட்ட செயலாளர் என்பது தெரியவந்தது.
பள்ளி மாணவியும், சத்யாவும் முகநூல் மூலமாக சில மாதங்களுக்கு முன் பழக்கமாகி உள்ளனர். தனக்கு திருமணம் ஆகவில்லை எனவும் அதனால் உன்னை திருமணம் செய்துகொள்வதாகவும் கூறி பள்ளி மாணவியை சத்யா நம்ப வைத்துள்ளார்.
மேலும், 27ஆம் தேதி பள்ளிக்கு சென்ற மாணவியை திருமணம் செய்துகொள்வதாக அழைத்துச் சென்று மாணவியிடம் திருமணத்தை மீறிய உறவு வைத்துள்ளார். அதன் பின்பு சத்யாவுக்கு திருமணம் ஆன விஷயம் பள்ளி மாணவிக்கு தெரியவர, அவர் கீழ்ப்பாக்கம் அனைத்து மகளிர் காவல் நிலையத்தில் புகார் அளித்தார். இதனையடுத்து வழக்குப்பதிவு செய்த போலீசார் சத்யாவை போக்சோ சட்டத்தின் கீழ் கைது செய்து விசாரணை மேற்கொண்டு வருகின்றனர்.
