சென்னை: மாலத்தீவு பகுதியை ஒட்டி நிலவும் வளிமண்டல மேலடுக்கு சுழற்சி காரணமாக அடுத்த 24 மணி நேரத்திற்கு ராமநாதபுரம், சிவகங்கை மற்றும் தூத்துக்குடி மாவட்டங்களில் ஓரிரு இடங்களில் இடியுடன் கூடிய கன மழை பெய்யக்கூடும் என சென்னை வானிலை ஆய்வு மையம் தெரிவித்துள்ளது. இதுகுறித்து வெளியிடப்பட்டுள்ள செய்திக் குறிப்பில், மாலத்தீவு பகுதியை ஒட்டி நிலவும் வளிமண்டல மேலடுக்கு சுழற்சி காரணமாக அடுத்த 24 மணி நேரத்திற்கு ராமநாதபுரம், சிவகங்கை மற்றும் தூத்துக்குடி மாவட்டங்களில் ஓரிரு இடங்களில் இடியுடன் கூடிய கன மழையும், தென் தமிழ்நாட்டு கடலோர மாவட்டங்கள், டெல்டா மாவட்டங்களில் ஒரு சில இடங்களில் மிதமான மழையும், உள் மாவட்டங்களில் ஒரு சில இடங்களில் லேசானது முதல் மிதமான மழையும் பெய்யக்கூடும்.
தென் கடலோர மாவட்டங்களில் ஒரு சில இடங்களில் நாளை (ஜனவரி 15) லேசானது முதல் மிதமான மழையும், தமிழ்நாடு மற்றும் புதுவை, காரைக்கால் பகுதிகளில் ஓரிரு இடங்களில் நாளை மறுநாள் (ஜனவரி 16) லேசான மழையும் பெய்யக்கூடும். சென்னை மற்றும் புறநகர் பகுதிகளைப் பொறுத்தவரை அடுத்த 48 மணி நேரத்திற்கு வானம் ஓரளவு மேகமூட்டத்துடன் காணப்படும்.
கடந்த 24 மணி நேரத்தில், அதிகபட்சமாக திருநெல்வேலி மாவட்டத்தில் உள்ள பாபநாசத்தில் 18 செ.மீ., மணிமுத்தாறு 16 செ.மீ., அம்பாசமுத்திரத்தில் 9 செ.மீ., மழையும், தூத்துக்குடியில் 11 செ.மீ., ராமநாதபுரம் கடலாடி, புதுக்கோட்டை மாவட்டம் திருமயம் பகுதிகளில் 8 செ.மீ., தூத்துக்கு மாவட்டம் ஓட்டப்பிடாரம், விருதுநகர் மாவட்டம் பிளவக்கல், தென்காசி, புதுக்கோட்டை மாவட்டம் அரிமளம் ராமநாதபுரம் மாவட்டம் வாலிநோக்கம் பகுதிகளில் தலா 7 செ.மீ மழை பதிவாகியுள்ளது.
லட்சத்தீவு, மாலத்தீவு பகுதிகளில் சூறாவளிக்காற்று மணிக்கு 40 முதல் 50 கிமீ வேகத்தில் வீசக்கூடும் என்பதால், மீனவர்கள் அந்த பகுதிகளுக்கு மீன் பிடிக்க செல்ல வேண்டாம் என்று அறிவுறுத்தப்பட்டுள்ளார்கள்.
இதையும் படிங்க: கொடைக்கானலில் தொடர்மழை: மக்களின் இயல்பு வாழ்க்கைப் பாதிப்பு
