சென்னையிலிருந்து மலேசியாவிற்கு இன்று அதிகாலை செல்லும் ஏர் ஏசியா விமானத்தில் கணக்கில் இல்லாத ஹவாலா பணம் கடத்தப்படுவதாக சுங்கத் துறைக்கு ரகசிய தகவல் கிடைத்தது. இதையடுத்து அந்த விமானத்தில் செல்லவிருந்த பயணிகளை அலுவலர்கள் தீவிரமாகக் கண்காணித்தனர். அப்போது திருவாரூரைச் சோ்ந்த சையத் இப்ராஹிம் (36), விருதுநகரைச் சோ்ந்த அப்துல் அஜீஸ் (51) ஆகிய இரண்டு போ் சுற்றுலாப் பயணிகள் நுழைவு இசைவில் (விசா) மலேசியா செல்லவந்தனர்.
அவர்கள் டிராவல் பேக்கை சோதித்தபோது, அதில் கட்டுக்கட்டாக வெளிநாட்டுப் பணம், யூரோ, ஆஸ்திரேயலியா நாட்டு கரன்சிகள் மறைத்து வைத்திருந்ததைக் கண்டுபிடித்தனர். அதன் மதிப்பு ரூ.45.4 லட்சம் ஆகும். இதையடுத்து பணத்தை பறிமுதல் செய்து இருவரையும் கைது செய்து விசாரணை நடந்துவருகிறது.
அதுமட்டுமின்றி, மும்பையிலிருந்து ஏா் இந்தியா விமானம் சென்னை உள்நாட்டு முனையத்திற்கு நள்ளிரவில் வந்தது. அந்த விமானத்தில் கடத்தல் தங்கம் வருவதாகக் கிடைத்த தகவலின்பேரில் சுங்கத் துறை அலுவலர்கள் அந்த விமான பயணிகளை சோதனை நடத்தினர்.
அப்போது மும்பையைச் சோ்ந்த தீபன் அசோக் சுதார் (33) என்பவா் சூட்கேசுக்குள் மறைத்து வைத்திருந்த 1.19 கிலோ எடையுள்ள ஆறு தங்கக் கட்டிகளைப் பறிமுதல் செய்தனர். அதன் மதிப்பு ரூ.43.7 லட்சம் ஆகும். அவரையும் அலுவலர்கள் கைது செய்து விசாரித்துவருகின்றனர்.
