சென்னை நகரில் கரோனா பரவல் நாளுக்கு நாள் தீவிரமடைந்துவருகிறது. கரோனா பரவலைக் கட்டுப்படுத்த மாநகராட்சி, சுகாதாரத் துறை, காவல் துறை எனப் பலவும் பல்வேறு முன்னெச்சரிக்கை நடவடிக்கைகளில் ஈடுபட்டுவருகின்றன்.
குறிப்பாக, காவல் துறையினர் கட்டுப்படுத்தப்பட்ட பகுதிகளில் கண்காணிப்புப் பணியில் ஈடுபடுவது, மற்ற பணியாளர்களுடன் சென்று கரோனா பாதித்தவரை அழைத்துவருவது, ஊரடங்கு மீறுபவர்களைக் கட்டுப்படுத்துவது போன்ற பல்வேறு தடுப்புப் பணிகளில் ஈடுபட்டுவருகின்றனர்.
இந்நிலையில், காவல் துறையினரையும் கரோனா வைரஸ் (தீநுண்மி) விட்டுவைக்கவில்லை. போக்குவரத்து, ஆயுதப்படை, தீயணைப்பு, ரயில்வே, ஊர்க்காவல்படை என அனைத்துநிலை காவலர்களுக்கும் தொற்று பரவியுள்ளது. அதிலும் குறிப்பாக, சென்னையில் இன்று ஒரேநாளில் பெண் ஆய்வாளர் உள்பட ஐந்து காவல் ஆய்வாளர்களுக்கு கரோனா தொற்று உறுதியாகியுள்ளது அச்சத்தை ஏற்படுத்தியுள்ளது.
அதன்படி, சென்னை மத்தியக் குற்றப்பிரிவு காவல் ஆய்வாளர், சாத்தாங்காடு காவல் நிலைய பெண் ஆய்வாளர், முத்தியால்பேட்டை காவல் ஆய்வாளர், எண்ணூர் காவல் ஆய்வாளர் உள்பட ஐந்து காவல் ஆய்வாளர்கள் ஒரேநாளில் கரோனாவால் பாதிக்கப்பட்டுள்ளனர்.
மேலும், மந்தைவெளி ரயில் நிலைய அறையில் தங்கி சுமார் 40 ஆயுதப்படை காவலர்கள், பாதுகாப்புப் பணியில் ஈடுபட்டுவருகின்றனர். இந்த நிலையில், அறையில் தங்கியிருந்த ஆயுதப்படைக் காவலர் ஒருவருக்கு கரோனா உறுதியாகியுள்ளது.
இதனால் அவருடன் தங்கியிருந்த 39 பேருக்கும் கரோனா கண்டறியும் சோதனை செய்யப்பட்டதில் நான்கு ஆயுதப்படை காவலர்களுக்கு கரோனா தொற்று இருப்பது கண்டறியப்பட்டுள்ளது.
இதையும் படிங்க: கரோனாவும் சென்னை காவலர்களும் - அதிகரிக்கும் பாதிப்பு!
