சென்னை: வேளாண் சட்டத்தை எதிர்த்து திமுக நடத்திய போராட்டத்தில் கலந்துகொண்ட உதயநிதி ஸ்டாலின், அதிமுக அரசை அடிமை அரசு என்று கடுமையாக விமர்சித்து பேசினார்.
வேளாண் சட்டத்தை எதிர்த்து தமிழ்நாடு முழுவதும் திமுகவும், அதன் தோழமை கட்சிகளும் சேர்ந்து ஆர்பாட்டம் நடத்தியது. இதன் ஒரு பகுதியாக வள்ளுவர் கோட்டத்தில் சென்னை மேற்கு மாவட்ட பொறுப்பாளர் சிற்றரசு தலைமையில் ஆர்பாட்டம் நடந்தது. இதில் திமுக இளைஞர் அணி செயலாளர் உதயநிதி ஸ்டாலின், திராவிடர் கழக துணை தலைவர் கலி பூங்குன்றன், திமுக செய்தி தொடர்பாளர், மாநிலங்களவை உறுப்பினருமான டி.கே.எஸ்.இளங்கோவன் உள்ளிட்டவர்கள் பங்கேற்று கண்டன உரையாற்றினர்.
இதில் திமுக இளைஞர் அணி செயலாளர் உதயநிதி ஸ்டாலின் மேடையில் பேசும்போது, “கரோனா காலத்தில் பல உதவிகள் ஒன்றினைவோம் வா என்ற திட்டம் மூலம் செய்து வந்தோம். தற்போது விவசாயிகளுக்காக போராடி வருகின்றோம். இதே நேரத்தில் இரண்டு பேர் இணைந்து யார் முதலமைச்சர் வேட்பாளர் என்று அதிமுக செயற்குழு கூட்டத்தில் பேசி வருகின்றனர். இரண்டு பேரும் சேர்ந்து பாஜக உறுப்பினரை கூட முதலமைச்சர் வேட்பாளராக அறிவிக்க வாய்ப்புகள் அதிகம். அந்த அளவு அடிமைப்பட்டு கிடக்கிறார்கள்.
எல்லாத்தையும் சிரித்து கொண்டே கூறுவார்கள். இப்படி தான் நீட் விவகாரத்தில் கூறி நீட் தேர்வு நடந்ததுள்ளது. திமுக ஆட்சியில் நிச்சியம் நீட் ரத்து செய்யப்படும். விவசாயி பிரச்னையை இத்தோடு விட மாட்டோம். தொடர்ந்து குரல் கொடுப்போம். இன்னும் 7 மாத காலம்தான். இதில் தோழமை தலைவர்கள் முடிவில் இன்னும் உறுதியுடன், தெம்புடன் இருப்பீர்கள் என்று நினைகிறேன் என்றார்.
தொடர்ந்து பேசிய திமுக மாநிலங்களவை உறுப்பினர் டி.கே.எஸ்.இளங்கோவன், அதிமுக மாநிலங்களவை உறுப்பினர் எஸ்.ஆர்.பாலசுப்பிரமணியம் வேளாண் சட்டத்தை எதிர்த்து பேசியுள்ளார். எஸ்.ஆர்.பி நமது ரத்தம். வேறு வழியின்றி அதிமுகவில் ஒரு காலத்தில் இணைந்தார். நம் ரத்தம் நமக்காக பேசுகிறார் என்றார்.
திராவிடர் கழக துணை தலைவர் கலி பூங்குன்றன் பேசியபோது, திமுக வெற்றிபெறவேண்டும் என கூறுவது ஸ்டாலின் முதலமைச்சராக வேண்டும் என்பதற்காக அல்ல. நமது மக்கள் உயிர் வாழ வேண்டும் என்றால் திமுக ஆட்சி அமைக்க செய்ய வேண்டும். நூறு விழுக்காடு வெற்றிபெறச் செய்ய வேண்டும் என்றார்.
