தியாகராய நகரில் தீபாவளி பண்டிகையை முன்னிட்டு செய்யப்பட்டுள்ள பாதுகாப்பு ஏற்பாடுகளை, காவல் ஆணையர் மகேஷ் குமார் அகர்வால் பார்வையிட்டு கண்காணிப்பு கேமரா மையம், சேவை மையங்கள் ஆகியவற்றை துவக்கி வைத்தார். பின்னர் செய்தியாளர்களை சந்தித்த அவர், ” தி.நகர் மார்க்கெட் பகுதிகளில் ஏற்கனவே உள்ள 200 கேமராக்களுடன் கூடுதலாக 100 கண்காணிப்பு கேமராக்கள் பொருத்தப்பட்டுள்ளன. இதன் மூலம் கூட்ட நெரிசலை பயன்படுத்தி குற்ற நிகழ்வுகளில் ஈடுபடுபவர்களை கண்காணிக்க முடியும்.
அசம்பாவிதங்களை தவிர்க்கவும், பாதுகாப்பை உறுதி செய்யவும் 2 ட்ரோன் மூலம் கண்காணிக்கப்படும். கரோனா காலம் என்பதால் விழிப்புணர்வை ஏற்படுத்தும் வகையில் 10 விழிப்புணர்வு மையங்களும் அமைக்கப்பட்டுள்ளன. பொதுமக்கள் முகக்கவசம், தனிமனித இடைவெளி கடைபிடிப்பதை உறுதி செய்ய, வியாபாரிகளுக்கு அறிவுறுத்தப்பட்டுள்ளது. 500 கூடுதல் காவல்துறையினர் கண்காணிப்பு பணியில் ஈடுபடுவார்கள்.
போக்குவரத்து நெரிசலை கட்டுப்படுத்த அருகமை பள்ளிகளில் பார்க்கிங் வசதிகள் ஏற்படுத்தப்பட்டுள்ளன. கடந்த ஆண்டு உச்ச நீதிமன்றம் உத்தரவிட்டதை தொடர்ந்து பொதுமக்களிடம் போதிய விழிப்புணர்வு ஏற்பட்டுள்ளது. எனினும் கரோனா காலம் என்பதால், அரசு அறிவித்த காலை 1 மணி நேரம், மாலை 1 மணி நேரம் தவிர்த்து பட்டாசு வெடிப்பவர்கள் மீது சட்ட நடவடிக்கை எடுக்கப்படும் ” என எச்சரித்தார்.
இதையும் படிங்க: சென்னை விமானநிலையத்தில் பள்ளி முதல்வரிடம் துப்பாக்கி குண்டு பறிமுதல்!
