கரோனா வைரஸ் தொற்று நோயினைத் தடுக்கும் விதமாக மத்திய மற்றும் மாநில அரசுகள் பல உத்திகளைக் கையாண்டுவருகின்றன. அதன் ஒரு பகுதியாக, மத்திய ஆயுஷ் அமைச்சகம் கோவிட்-19 தொற்று நோயினை தடுப்பதற்கு உரிய வழிகாட்டுதல்களை வழங்கியுள்ளது. அதில் நிலவேம்பு குடிநீர் மற்றும் கபசுரக் குடிநீரை பொதுமக்களுக்கு வழங்கி, நோய் எதிர்ப்பு சக்தியை அதிகரிக்க ஒரு வழிகாட்டுதலை வழங்கியுள்ளது.
முதலமைச்சரின் உத்தரவின்பேரில் மருத்துவ வல்லுநர்களைக் கொண்ட குழு ஒன்று அமைக்கப்பட்டது. இக்குழுவில் அரசு மற்றும் தனியார் துறைகளைச் சார்ந்த மூத்த மருத்துவர்கள் இடம்பெற்று, ஆலோசனை செய்து அரசுக்கு தங்களுடைய பரிந்துரைகளை வழங்கினர்.
அதில், மத்திய அரசின் ஆயுஷ் அமைச்சகத்தின் வழிகாட்டுதல்களைக் கருத்தில் கொண்டு, சித்த மருத்துவம், ஆயுர்வேதம், யோகா மற்றும் இயற்கை மருத்துவம், யுனானி மற்றும் ஹோமியோபதி உள்ளிட்ட மருத்துவ முறைகளில் உள்ள நோய் எதிர்ப்பு சக்தியை அதிகரிக்கும் வழிமுறைகளை மக்கள் பயன்படுத்திக் கொள்ள “ஆரோக்கியம்” என்ற சிறப்புத் திட்டம் மூலம் வழிமுறைகளை வெளியிட பரிந்துரைகளை வழங்கினார்கள்.
அதன்படி, தமிழ்நாட்டு பொதுமக்கள் நோய் எதிர்ப்பு சக்தியை அதிகரித்துக் கொள்ளவும், சிகிச்சை பெற்ற பின் உடல் நலத்தைப் பேணவும், ஆரோக்கியம் என்ற சிறப்புத் திட்டத்தினைத் தொடங்கி வைத்து, நோய் எதிர்ப்பு சக்தியைக் கூட்டுவதற்கு பொதுமக்களுக்கு நிலவேம்பு குடிநீர் மற்றும் கபசுரக் குடிநீர் சூரணப் பொட்டலங்களை முதலமைச்சர் இன்று வழங்கினார்.
இதைத்தொடர்ந்து சென்னை மாநகரில் நோய் கட்டுப்பாட்டுப் பகுதியில் (Containment Zone) வசிக்கும் ஒரு லட்சம் குடும்பங்களுக்கு, கபசுரக் குடிநீர் சூரணப் பொட்டலங்கள் வழங்கப்படும் என்றும், இந்த விநியோகத்திலும் சம்பந்தப்பட்ட அலுவலர்களும், பயனாளிகளும் சமூக இடைவெளியை முறையாக கடைப்பிடிக்கவும் அறிவுறுத்தப்பட்டுள்ளது. மேலும், நிலவேம்போ, கபசுரக் குடிநீரோ, கரோனா நோய்க்கான சிகிச்சை அல்ல எனவும், நோய் எதிர்ப்பு சக்தியை அதிகரிக்க மட்டுமே என்றும் அரசு தெளிவுபடுத்தியுள்ளது.
இதையும் படிங்க: கரோனா பரிசோதனை செய்துகொண்ட முதலமைச்சர்!
