சென்னை: தாம்பரம் மாநகராட்சியாக அறிவிக்கப்பட்டு மூன்று ஆண்டுகள் கடந்து விட்டது. ஆனால், அப்பகுதியில் அடிப்படை வசதிகள் முழுமை பெறாமல் இருப்பதாக சமூக ஆர்வலர்கள் குற்றச்சாட்டை முன் வைத்துள்ளனர். இந்த நிலையில், தாம்பரம் மாநகராட்சியில் பாதாள சாக்கடை, சாலை வசதிகள், மழைநீர் வடிகால், குடிநீர் வசதி உள்ளிட்ட அனைத்து திட்டங்களும் இந்த ஆண்டு இறுதிக்குள் உறுதியாக முடிக்கப்படும் என தாம்பரம் மாநகராட்சி ஆணையர் பாலச்சந்தர் உறுதி அளித்துள்ளார்.
கடந்த 2021 ஆம் ஆண்டு தமிழ்நாட்டில் திமுக ஆட்சி பொறுப்பேற்றது. இதன் பின்னர், சென்னை மாநகராட்சிக்கு அருகே உள்ள தாம்பரம் நகராட்சியை, மாநகராட்சியாக்கி அதனைச் சுற்றியுள்ள பேரூராட்சிகளை இணைத்தது. தாம்பரம் மாநகராட்சி 5 மண்டலங்கள், 70 வார்டுகள் என தரம் உயர்த்தப்பட்டது.
இதனால், அப்பகுதி மக்கள் தங்கள் பகுதிகளுக்கு தரமான சாலைகள், மேம்பாலங்கள், பாதாள சாக்கடை திட்டம், மழை நீர் வடிகால்வாய்கள் போன்ற அனைத்து அடிப்படை வசதிகளும் கிடைக்கும் என மகிழ்ச்சி அடைந்தனர். தாம்பரம் மாநகராட்சியாக அறிவிக்கப்பட்டு தற்போது மூன்று ஆண்டுகள் முடிந்துள்ளது. ஆனால், இப்பகுதிகளில் தொடங்கப்பட்ட அனைத்து திட்டங்களும் முழுமை பெறாமல் காலதாமதமாகி வருவதாக தற்போது மக்கள் குற்றச்சாட்டுகின்றனர்.
குறிப்பாக, கடந்த மூன்று ஆண்டுகளில் தாம்பரம் மாநகராட்சியில் வரிகள் மட்டுமே உயர்த்தப்பட்டிருப்பதாகவும், மக்களுக்கான அடிப்படை வசதிகள் எதுவும் தீர்த்து வைக்கப்படவில்லை என சமூக ஆர்வலர்கள் குற்றம் சாட்டுகின்றனர். மேலும், பெயருக்கு மட்டுமே மாநகராட்சி என்றும், இதற்கு நகராட்சியாகவே தாம்பரம் இருந்திருக்கலாம் எனவும் பொதுமக்கள் வேதனை தெரிவிக்கின்றனர்.
இது குறித்து சிட்லபாக்கம் சமூக ஆர்வலர் தயானந்தன் ஈடிவி பாரத்திடம் கூறுகையில், “ சிட்லபாக்கம் தாம்பரம் மாநகராட்சியுடன் இணைக்கப்பட்டது. இதனால், இப்பகுதியில் குடிநீர் வசதிகள், பாதாள சாக்கடை திட்டத்தின் மூலம் ஏரிகள் பாதுகாக்கப்படும், தரமான சாலைகள் அமைக்கப்பட்டும் என்ற எதிர்பார்ப்புகள் இருந்தது. ஆனால், மூன்று ஆண்டுகள் கடந்துள்ள நிலையில், இந்த எதிர்பார்ப்புகள் அனைத்தும் ஏமாற்றமாகவே உள்ளது.
திட்டங்கள் தயாரித்து அரசுக்கு அனுப்பி உள்ளதாகவும், அரசு நிதி வழங்கியவுடன் பணிகள் தொடங்கப்படும் என அதிகாரிகள் தெரிவிக்கின்றனர். தமிழ்நாடு அரசு தாம்பரம் மாநகராட்சிக்கு, குடிநீர் மற்றும் பாதாள சாக்கடை திட்டங்களுக்கு சிறப்பு நிதிகளை ஒதுக்க வேண்டும் என்றார்.
வரி கட்டணங்கள் உயர்வு:
தொடர்ந்து, பெருங்களத்தூர் குடியிருப்பு நல சங்க தலைவர் மகேந்திர பூபதி கூறுகையில், “தாம்பரம் மாநகராட்சியாக தரம் உயர்ந்த பிறகு, பெருங்களத்தூர் பீர்க்கங்கரணை பகுதியில் உள்ள 48 சாலைகளை சீரமைக்க புகார் கொடுக்கப்பட்டது. ஆனால், இதுவரையில் 7 சாலைகளை மட்டுமே சீரமைக்கப்பட்டுள்ளன. மாநகராட்சியில் வரி மற்றும் கட்டணங்கள் அதிகரிக்கப்பட்டுள்ளது.
| இதையும் படிங்க: சென்னை உள்ளிட்ட 4 மாவட்டங்களில் ஆட்சேபனையற்ற புறம்போக்கு பகுதிகளில் குடியிருப்பவர்களுக்கு பட்டா - அமைச்சரவை ஒப்புதல்! |
சுற்றுவட்டாரப் பகுதியில் நாய்கள் மற்றும் மாடுகள் தொல்லைகள் அதிகம் உள்ளது. இதனை கட்டுப்படுத்த மாநகராட்சி தவறிவிட்டது. எனவே, தமிழ்நாடு முதலமைச்சர் போர்க்கால அடிப்படையில் தாம்பரம் மாநகராட்சியில் அடிப்படை வசதிகளை விரைவில் செய்து முடிக்க உத்தரவிட வேண்டும்” என கோரிக்கை வைத்தார்.
குரோம்பேட்டையைச் சேர்ந்த சமூக ஆர்வலர் சந்தானம் கூறுகையில், “சென்னை மாநகராட்சியுடன் பல்லாவரம், குரோம்பேட்டை பகுதிகளை இணைத்திருந்தால் அனைத்து சகல வசதிகளும் கிடைத்திருக்கும். இப்பகுதியில் கொசு மருந்து கூட அடிக்கவில்லை. மழைநீர் வடிக்கால்வாயில் சாக்கடை நீர் ஓடுகிறது. மாநகராட்சிக்கு தற்போது தேர்தல் வைத்தால் யாரும் வாக்களிக்க மாட்டார்கள். மாநகராட்சியில் 22 பொறியாளர்கள் காலி பணியிடங்களுக்கு, ஆட்கள் நியமிக்கப்படாமல் உள்ளனர்” என்றார்.
மாநகராட்சி ஆணையர் விளக்கம்:
இது குறித்து தாம்பரம் மாநகராட்சி ஆணையர் பாலச்சந்தரை தொடர்பு கொண்டு கேட்டபோது, “தாம்பரம் மாநகராட்சியில், பாதாள சாக்கடை பணிக்காக ரூ.1,276 கோடி திட்ட அறிக்கை அரசுக்கு கொடுக்கப்பட்டுள்ளது. மூன்று மாதத்திற்குள் அரசு அதற்கான நிதியை ஒதுக்கும் என எதிர்பார்க்கிறோம். சாலை வசதிக்காக ரு.141 கோடி மதிப்பில் திட்ட அறிக்கை சமர்ப்பிக்கப்பட்டுள்ளது. அதற்கான நிதியையும் இரண்டு மாதத்தில் குறைந்தபட்சம் ரூ.100 கோடியாவது அரசு ஒதுக்கும் என எதிர்பார்க்கிறோம்.
தாம்பரம் மாநகராட்சியில் மேற்கொள்ளப்படும் திட்ட பணிகள்:
அதேபோல், மழைநீர் வடிகால் பணிக்காக ரூ.1,605 கோடி திட்ட அறிக்கை மற்றும் புதிய பெயர் பலகை வைப்பதற்கு ரூ. 9.7 கோடி திட்ட அறிக்கை கொடுத்துள்ளோம். மழைநீர் வடிகால் பணிக்கான நிதி ஒதுக்குவதில் தாமதம் ஏற்படும். ஆனால், பெயல் பலகை வைப்பதற்கான நிதி ஒரு மாதத்தில் கிடைத்து விடும். மேலும், ரூ.46 கோடி மதிப்பில் தாம்பரம் மாநகராட்சிக்கு புதிய கட்டிடம் கட்டும் பணிகள் நடைபெற்று வருகிறது.
தொடர்ந்து, கன்னடபாளையம் பகுதியில் உள்ள குப்பை கிடங்கிற்கு, அதி நவீன இயந்திரங்கள் கொண்டு வரப்பட்டு குப்பைகளை தரம் பிரித்து அதனை மறுசுழற்சி செய்வதற்கு ரூ.36 கோடிக்கு திட்ட அறிக்கை கொடுக்கப்பட்டுள்ளது. அதற்கான நிதி ஒரு மதத்தில் கிடைத்துவிடும். தாம்பரம் மாநகராட்சியில், 3 நாட்களுக்கு ஒரு முறை குடிநீர் விநியோகம் செய்யப்படுகிறது. இப்பகுதியில் உள்ள 52 பூங்காவில் ரூ.40 கோடி மதிப்பில் சீரமைப்பு பணிகள் நடைபெற்று வருகிறது.
ஆண்டு இறுதிக்குள் பணிகள் முடிக்க நடவடிக்கை:
கடந்த ஆறு மாதத்தில், தாம்பரம் மாநகராட்சி கவுன்சிலர்கள் நிலையிலிருந்து ரூ. 108 கோடிநிதி ஒதுக்கீடு செய்து அனைத்து வார்டுகளிலும் அடிப்படை வசதிகள் மேம்படுத்தப்பட்டு வருகின்றது. தாம்பரம் மாநகராட்சியில் அனைத்து அடிப்படை வசதிகளும் கூடிய விரைவில் முழுமை பெறும். தொடர்ந்து பணிகளை கண்காணித்து தீவிரப்படுத்தி வருகிறோம். இந்த ஆண்டு இறுதிக்குள் அனைத்து பணிகளும் உறுதியாக முடிக்கப்படும்.
இதைத் தவிர்த்து தாம்பரம் மாநகராட்சிக்கு சிறப்பு திட்டங்களாக புதிய பூங்காக்கள், விளையாட்டு திடல், புதிய பேருந்து நிலையம் தயார் செய்யப்பட உள்ளது. மாடம்பாக்கம் ஏரி, வீரராகவன் மற்றும் பீர்க்கங்காரனை ஏரி ஆகிய 3 ஏரிகளை சிட்லபாக்கம் ஏரியை போல சீரமைக்க தேர்ந்தெடுத்துள்ளோம்.
இவ்வாறு தாம்பரம் மாநகராட்சி ஆணையர் பாலச்சந்தர் தெரிவித்தார்.
