இது குறித்து மெட்ரோ நிர்வாகம் வெளியிட்டுள்ள செய்திக்குறிப்பில், "சென்னை மெட்ரோ ரயில் நிறுவனம் பொதுமக்கள், பயணிகளின் கோரிக்கையை ஏற்று, வார நாள்களில் (திங்கள்கிழமை - சனிக்கிழமை) உச்ச நேரங்களில் 7 நிமிட இடைவெளியில் இயக்கப்பட்டுவரும் மெட்ரோ ரயில் சேவைகளை 5 நிமிட இடைவெளியில் இயக்க முடிவுசெய்யப்பட்டுள்ளது.
அதன்படி, இன்றுமுதல் (பிப்ரவரி 12) மெட்ரோ ரயில் சேவைகள் உச்ச நேரங்களில் (காலை 8 முதல் 10 மணி வரை, மாலை 4 முதல் 7 மணி வரை) 5 நிமிட இடைவெளியிலும் மற்ற நேரங்களில் (காலை 5.30 முதல் காலை 8 மணி வரை, காலை 10 முதல் மாலை 4 மணி வரை, இரவு 7 மணி முதல் 10 மணி வரை) 10 நிமிட இடைவெளியிலும் மெட்ரோ ரயில்கள் இயக்கப்படும்" எனத் தெரிவிக்கப்பட்டுள்ளது.
ஞாயிற்றுக்கிழமை, அரசு பொது விடுமுறை நாள்களில் மெட்ரோ ரயில் சேவைகள் நாள் முழுவதும் உச்ச நேரம் இல்லாமல் (Non-peak Hours) 20 நிமிட இடைவெளியில் இயக்கப்படும் எனவும், பயணிகள் அதற்கேற்ப தங்கள் பயணத்தைத் திட்டமிட்டுக் கொள்ளுமாறும் சென்னை மெட்ரோ ரயில் நிர்வாகம் கேட்டுக்கொண்டுள்ளது.
