ஊரடங்கு காரணமாக, பள்ளிகள் திறக்க தடை விதிக்கப்பட்டு, நடப்புக் கல்வியாண்டுக்கான பாடங்கள் இணைய வழியில் நடத்தப்படுகின்றன. இணைய வழி வகுப்புகளில் கலந்துகொள்ள மாணவ, மாணவியர் முயற்சிசெய்யும்போது, ஆபாச இணையதளங்களால் அவர்களின் கவனம் சிதைவதால், அந்த வகை இணையதளங்களை மாணவ, மாணவியர் அணுக இயலாத வகையில் விதிகளை வகுக்கும் வரை, இணைய வழி வகுப்புகளுக்கு தடை கோரி, சென்னை புத்தகரத்தைச் சேர்ந்த சரண்யா என்பவர் உயர் நீதிமன்றத்தில் பொதுநல வழக்கு தாக்கல் செய்துள்ளார்.
இதேபோல், வகுப்புகளைச் கைபேசி, மடிக்கணினி மூலம் பார்ப்பதால் மாணவர்களின் கண்களுக்கு பாதிப்பு ஏற்படுவதாகவும், எனவே 1 முதல் 5ஆம் வகுப்பு வரை இணைய வழி வகுப்புகள் நடத்த தடை விதிக்கவும், 6 முதல் 12ஆம் வகுப்பு வரையிலான மாணவர்களுக்கு, 2 மணி நேரம் மட்டும் வகுப்புகள் நடத்த உத்தரவிடவும் கோரி விமல் மோகன் என்பவரும் வழக்கு தொடர்ந்திருந்தார்.
இந்நிலையில், இந்த வழக்குகள் நீதிபதிகள் எம்.எம். சுந்தரேஷ், ஹேமலதா ஆகியோர் அடங்கிய அமர்வு முன்பு விசாரணைக்கு வந்தபோது, மத்திய அரசு சார்பில் ஜூலை 15ஆம் தேதிக்குள் இணைய வழி வகுப்புகளை ஒழுங்குபடுத்துவது தொடர்பாக வழிகாட்டு நெறிமுறைகளை வெளியிட உள்ளதாகத் தெரிவிக்கப்பட்டது.
அதன்படி, அதற்கான வழிமுறைகளை மத்திய அரசு வெளியிட்டுள்ளது. அதில், எல்.கே.ஜி., யூ.கே.ஜி. குழந்தைகளுக்கு 30 நிமிடங்கள், 1 முதல் 8ஆம் வகுப்பு வரை தலா 45 நிமிடங்கள் என 2 வகுப்புகள் மட்டும் நடத்த வேண்டும் என்றும் குறிப்பிடப்பட்டுள்ளது.
மேலும், 9 முதல் 12ஆம் வகுப்பு மாணவர்களுக்கு 45 நிமிடங்களுக்கு மிகாமல் நான்கு வகுப்புகள் நடத்தலாம் என்றும் மத்திய அரசு அறிவுறுத்தியுள்ளது. இந்த அறிவிப்பைப் பதில் மனுவாக மத்திய அரசு சார்பில் உயர் நீதிமன்றத்தில் இன்று தாக்கல் செய்யப்பட்டது.
அப்போது மனுதாரர்கள் சார்பில் ஆஜரான வழக்கறிஞர், தொடர்ந்து இணைய வழியில் பாடங்களைக் கவனிப்பதால் ’கம்ப்யூட்டர் விஷன் சின்ட்ரோம்’ என்ற நோய் வர வாய்ப்புள்ளதாகத் தெரிவித்தார். இருதரப்பு வாதங்களையும் கேட்ட நீதிபதிகள், மத்திய அரசின் வழிகாட்டுதலின்படி தமிழ்நாடு அரசு என்ன நடவடிக்கை எடுத்துள்ளது என்பது குறித்து, வரும் ஜூலை 27ஆம் தேதி பதிலளிக்க உத்தரவிட்டு வழக்கு விசாரணையை ஒத்திவைத்தனர்.
இதையும் படிங்க: பட்டப்படிப்புகள் செமஸ்டர் தேர்வு ரத்து வழக்கு - பல்கலைக்கழக மானியக் குழு பதிலளிக்க உத்தரவு
