சென்னை, பல்லாவரத்தை அடுத்த பம்மல் அம்பேத்கர் பகுதியைச் சேர்ந்த திமுக வட்டச் செயலர் ரகு (வயது 50). இவருக்குத் திருமணமாகி கார்த்திக் (வயது 20) என்ற மகனும் கீர்த்தி (வயது 19) என்கிற மகளும் உள்ளனர். இந்நிலையில், ரகுவுக்கும் அவரது மனைவி மலர்விழிக்கும் அடிக்கடி குடும்பத் தகராறு ஏற்பட்டு வந்ததாகக் கூறப்படுகிறது. தொடர்ந்து, கடந்த 21ஆம் தேதி இரவு ரகு வீட்டில் சண்டை போட்டுவிட்டு, வீட்டை விட்டு வெளியேறியுள்ளார்.
அதன்பின் ரகுவின் குடும்பத்தினர் அவரை இரண்டு நாள்களாகத் தேடியும் கண்டுபிடிக்க முடியவில்லை. இந்நிலையில், இன்று (அக்.23) பம்மல் பகுதியில் உள்ள ஒரு அடுக்குமாடிக் கடையில் சிதைந்த நிலையில், துர்நாற்றத்துடன் ஒருவர் உயிரிழந்து கிடப்பதாக அப்பகுதியில் மக்கள் காவல் நிலையத்தில் புகார் கொடுத்தனர்.
இப்புகாரின் பேரில் காவல் துறையினர் நேரில் சென்று பிரேதத்தை மீட்டு உடற்கூராய்வுக்காக குரோம்பேட்டை அரசு பொது மருத்துவமனைக்கு அனுப்பி வைத்தனர். தொடர்ந்து அவர்கள் விசாரணை மேற்கொண்டதில் மூன்று நாள்களுக்கு முன்பு காணாமல் போன திமுக வட்டச் செயலர் ரகு தான் கண்டெடுக்கப்பட்டவர் என்பது தெரிய வந்தது. இது குறித்து ரகுவின் மகன் கார்த்திக்குக்கு தொடர்ந்து தகவல் தெரிவிக்கப்பட்டது.
மேலும் இது குறித்து வழக்குப்பதிவு செய்து இது தற்கொலையா, கொலையா என்பது பற்றியும் காவல் துறையினர் தீவிர விசாரணை மேற்கொண்டு வருகின்றனர்.
