கரோனா இறப்புகளை அரசு மறைக்கிறது - அறப்போர் இயக்கம் பகிரங்க குற்றச்சாட்டு!

சென்னை: கரோனா இறப்புகளை அரசு மறைக்கிறது என அறப்போர் இயக்கத்தின் ஒருங்கிணைப்பாளர் ஜெயராம் வெங்கடேசன் குற்றஞ்சாட்டியுள்ளார்.

அறப்போர் இயக்கத்தின் ஒருங்கிணைப்பாளர் ஜெயராம் வெங்கடேசன் நமது ஈடிவி பாரத்திற்கு அளித்த சிறப்பு பேட்டியில், ”தமிழ்நாட்டில் ஜூன் 9ஆம் தேதி வரை கரோனாவால் 224 பேர் உயிரிழந்ததாக சுகாதாரத்துறை கூறியுள்ளது. ஆனால், சென்னை மாநகராட்சியின் இணையதளத்தில் 460 இறப்புகள் என இருக்கிறது. இவை இரண்டிற்கும் கிட்டத்தட்ட 236 எண்ணிக்கை வித்தியாசம் இருக்கிறது.

இதில் எது உண்மை என்பது தெளிவாகத் தெரியவில்லை. ஆனால், சுகாதாரத்துறை சார்பில் குழு அமைத்து இறந்தவர்கள் குறித்த விவரத்தை மறு ஆய்வு செய்யவுள்ளதாகவும், தனியார் மருத்துவமனைகள் இறப்பு குறித்த புள்ளி விவரத்தை சுகாதாரத்துறைக்கு அளிக்கவில்லை எனவும் கூறுகின்றனர்.

இந்நிலையில், அறப்போர் இயக்கம் சில கரோனா இறப்புத் தகவல்களை வெளியிட்டது. ஸ்டான்லி மருத்துவக் கல்லூரி மருத்துவமனையில் மே 28, 29 ஆகிய தேதிகளில் இறந்த இருவரின் உடற்கூறாய்வு அறிக்கையில், ’கோவிட்’ என இருக்கிறது. ஆனால், அவர்களது இறப்பை சுகாதாரத்துறை இன்று வரை கணக்கில் காண்பிக்கவில்லை. இதேபோல் ராஜா முத்தையா மருத்துவக் கல்லூரியில் கடந்த 4ஆம் தேதி இறந்த ஒருவரையும் கணக்கில் சேர்க்காமல் இருக்கிறது.

இறந்தவர்களின் விவரங்களை பராமரிக்க வேண்டிய முழு பொறுப்பும் சுகாதாரத்துறையையே சேரும். இதன் பின்னணியில், மரணத் தகவல்கள் மறைக்கப்படுகிறதோ என்ற மிகப்பெரும் கேள்வி எழுகிறது. இதனை சுகாதாரத்துறை இன்று வரை விளக்கவில்லை. பேரிடர் மேலாண்மை சட்டத்தின் கீழ் இறப்பு கணக்குகளை மறைத்திருந்தால் கடும் நடவடிக்கை எடுக்க வேண்டும்.

சென்னை மாநகராட்சியின் இணையதளத்தில் கரோனாவால் இறப்பவர் குறித்து உடனடியாக பதிவேற்றுவதில்லை. அதனால் யார் இறந்தார்கள் என்பது ஒரு மாதம் கழித்து தான் வெளியில் தெரிகிறது. இது குறித்த சந்தேகங்கள் வெளி வரும்போது தான் சுகாதாரத்துறையினர், மாநகராட்சியில் அளிக்கும் இறப்புகளில் வித்தியாசம் இருப்பதை ஒப்புக்கொண்டு ஆய்வினைத் தொடங்கியுள்ளனர்.

மேலும், இறப்புகள் குறித்து ஆய்வு செய்வதற்கு அமைக்கப்பட்டுள்ள குழுவிலும், யார் தவறு செய்திருக்க வாய்ப்புள்ளதோ, அவர்களையே நியமித்துள்ளனர். யார் மீது நடவடிக்கை எடுக்க வேண்டுமோ அவர்களையே குழுவில் நியமித்தால் உண்மை எப்படி வெளியில் வரும், வராது.

எனவே, இக்குழுவில் சுகாதாரத்துறை அல்லாத வேறு துறையை சார்ந்த அலுவலர்களையோ அல்லது ஓய்வு பெற்ற நீதிபதியைக் கொண்டோ விசாரணை மேற்கொள்ள வேண்டும் ” எனத் தெரிவித்துள்ளார்.

இதையும் படிங்க: சென்னையில் மன உளைச்சல் காரணமாக ஒருவர் தற்கொலை!