சென்னை: தமிழ்நாடு திறந்தநிலைப் பல்கலைக்கழக துணைவேந்தராக இருந்து பார்த்தசாரதி கடந்த 2019ஆம் ஆண்டு ஜூன் மாதம் 3 ஆம் தேதி துணைவேந்தராக பதவி ஏற்றார். அதனைத் தொடர்ந்து 3 ஆண்டுகள் முடிவடைந்ததால் பதவி காலம் 2022 ஜூன் 2 ஆம் தேதியுடன் முடிவடைந்தது. அதனைத் தொடர்ந்து பல்கலைக் கழகத்தை நிர்வாகம் செய்ய உயர்கல்வித்துறை செயலாளர் கார்த்திகேயன் தலைமையில் குழு அமைக்கப்பட்டுள்ளது.
தமிழ்நாடு அரசினால் நடத்தப்படும் மாநில பல்கலைக் கழகங்களில் துணைவேந்தர்களை நியமனம் செய்யும் அதிகாரம் தமிழ்நாடு ஆளுநரிடம் இருந்து முதலமைச்சருக்கு மாற்றும் வகையில் சட்டப்பேரவையில் மசோதாக்கள் நிறைவேற்றப்பட்டுள்ளது. இந்த மசோதாக்கள் தமிழ்நாடு ஆளுநரின் அனுமதிக்காக காத்திருக்கின்றது.
இந்த நிலையில் தமிழ்நாடு ஆளுநரால் நியமனம் செய்யப்பட்ட தேடுதல் குழு தமிழ்நாடு திறந்தநிலைப் பல்கலைக் கழகத்திற்கான துணைவேந்தர் தேர்வு செய்வதற்கான பணிகளை தொடங்கி உள்ளது.
இது குறித்து துணைவேந்தர் தேர்வுக்குழுவின் தலைவர் பிச்சுமணி வெளியிட்டுள்ள அறிவிப்பில், "தமிழ்நாடு திறந்தநிலைப் பல்கலைக் கழகத்தின் துணைவேந்தர் பதவிக்கான 3 நபர்களின் பெயர்களை தமிழ்நாடு ஆளுநர் மற்றும் பல்கலைக் கழக வேந்தருக்கு பரிந்துரை செய்ய மனோன்மணியம் சுந்தரனார் பல்கலைக் கழகத்தின் துணைவேந்தர் பிச்சுமணி தலைமையில் குழு அமைக்கப்பட்டுள்ளது.
உயர்கல்வித்துறையின் அறிவிப்பின்படி கல்வித்தகுதியும், பணி அனுபவமும், தலைமைப்பண்பும் கொண்ட நேர்மைமிக்க , பொறுப்பு வாய்ந்த கல்வியாளர்களிடம் இருந்து துணைவேந்தர் பதவிக்கு விண்ணப்பங்கள் வரவேற்கப்படுகிறது. துணைவேந்தராக நியமிக்கப்படுபவர்கள் 3 ஆண்டுகள் பதவி வகிப்பார். பதவிக் காலத்திற்குள் 70 வயதை அடைந்தால் அப்போழுதே பணி நிறைவு பெறுவார்.
அனுபவமும், தகுதியும் வந்த நபர்கள் https://tnou.ac.in என்ற இணையதள முகவரியில் விண்ணப்படிவத்தை பதிவிறக்கம் செய்து ஜூலை 20 ஆம் தேதி மாலை 5 மணிக்குள் விண்ணப்பிக்கலாம். பூர்த்தி செய்த விண்ணப்பங்களை சுவாமிநாதன், தொடர்பு அதிகாரி, அண்ணாப்பல்கலைக் கழகம், சென்னை -600025 என்ற முகவரிக்கும், tnouvcsc2022@gmail.com என்ற இமெயில் முகவரிக்கும் அனுப்பலாம்.
விண்ணப்பங்கள் தேர்வு குழு உறுப்பினர்களுக்கு நேரடியாக அனுப்பக்கூடாது. இது தொடர்பாக நிர்வாகத்தை எந்த வழியல் அணுகினாலும் அவரது விண்ணப்பம் தகுதியிழக்கும்" என அதில் கூறியுள்ளார்.
இதையும் படிங்க: 'சசிகலாவுடன் இணைவதற்கு ஓபிஎஸ் தயாராக இருக்கிறார்' - ஆவின் வைத்தியநாதன்
