சென்னை: மேற்கு தாம்பரம் கிருஷ்ணா நகரைச் சேர்ந்த தம்பதி கோகுல் (26), யாஸ்மின் (25). கோகுல் கடந்த சில வருடங்களாக வேலைக்குச் செல்லாமல் வீட்டிலேயே இருந்து வந்துள்ளார். அவரது மனைவி யாஸ்மின் குரோம்பேட்டையில் உள்ள துணி கடையில் வேலை பார்த்து வருகிறார்.
இந்நிலையில், நேற்றிரவு கோகுலின் வீட்டிற்கு வந்த 5 பேர் கொண்ட கும்பல் கோகுலிடம் பேச வேண்டும் எனக்கூறி அவரை வெளியே அழைத்துள்ளனர். வெளியே வந்ததும் மறைந்து வைத்திருந்த பயங்கர ஆயுதங்களால் ஓட ஓட விரட்டி அவரை சரமாரியாக வெட்டிவிட்டு அங்கிருந்து தப்பிச் சென்றனர்.
இதில் தலை, கை, கால்களில் பலத்த காயமடைந்த கோகுல் சென்னை ராஜீவ் காந்தி அரசு மருத்துவமனையில் சிகிச்சைப் பெற்று வருகிறார். இந்த நிலையில், இந்த சம்பவம் குறித்து வழக்குப்பதிவு செய்த தாம்பரம் காவல் துறையினர் அப்பகுதியில் வைக்கப்பட்டிருந்த சிசிடிவி கேமராவில் பதிவான காட்சிகளை ஆய்வு செய்தனர்.
அதில் கோகுலை வெட்டியது தாம்பரத்தைச் சேர்ந்த விஜயகுமார் மற்றும் அவரது நண்பர்களான அருண்ராஜ், ஜெய்கிருஷ்ணன் உள்ளிட்ட 5 பேர் கொண்ட கும்பல் என்பது தெரியவந்தது. உடனே தனிப்படை அமைத்த காவல் துறையினர், விஜயகுமார் மற்றும் அவரது நண்பர்களைச் சுற்றி வளைத்துப் பிடித்தனர். பின்னர் அவர்களிடம் மேற்கொண்ட விசாரணையில் கொலை முயற்சிக்கான பல்வேறு திடுக்கிடும் சம்பவங்கள் வெளிவந்தன.
காவல் துறையினரால் பிடிக்கப்பட்ட விஜயகுமாரும் தாக்குதலுக்கு உள்ளான கோகுலின் மனைவி யாஸ்மினும் 11ஆம் வகுப்பில் ஒன்றாக படித்தவர்கள். அப்போது இருவரும் காதலித்து வந்ததாக தெரிகிறது. இவர்களது காதல் விவகாரம், யாஸ்மினின் வீட்டிற்குத் தெரியவர கடும் எதிர்ப்பு கிளம்பியது. உடனே சையது என்பவருக்கு யாஸ்மினை திருமணம் செய்து கொடுத்தனர்.
அமைதியாக சென்ற அவர்களின் திருமண வாழ்க்கையில் இரண்டு குழந்தைகளும் பிறந்தது. இருந்தும் யாஸ்மின் விஜயகுமாருடனான உறவை துண்டிக்கவில்லை. அது சையதுக்குத் தெரியவர குடும்பத்தில் பிரச்சினை வெடித்தது. அதில் கணவனை பிரிந்த யாஸ்மின் விஜயகுமாருடன் ஒன்று சேர்ந்தார். இருவரும் கணவன் மனைவி போல வாழ தொடங்கினர். அப்போது, பள்ளிக்கூடத்து சீனியரான கோகுலுடன் யாஸ்மினுக்கு பழக்கம் ஏற்பட்டது.
சையதை ஏமாற்றி விஜயகுமாருடன் பழகிய யாஸ்மின், விஜயகுமாரை ஏமாற்றி கோகுலுடன் பழக ஆரம்பித்தார். புது ஜோடி இருவரும் அடிக்கடி செல்போனில் பேசி நேரத்தை கடத்தி வந்தனர். அதற்கிடையே வழிப்பறி, அடிதடி உள்ளிட்ட வழக்குகளில் கைது செய்யப்பட்டு விஜயகுமார் சிறைக்குச் சென்றார்.
அது யாஸ்மினுக்கு இன்னும் வசதியாகப் போனது. சீனியருடன் சேர்ந்து மூன்றாவது திருமணம் செய்துகொண்ட யாஸ்மின் தாம்பரத்தில் வீடு எடுத்து கடந்த 2 ஆண்டுகளாகத் தங்கி வந்துள்ளனர். பின்னர் சிறையில் இருந்து வெளியே வந்த விஜயகுமாருக்கு விசயம் தெரியவந்தது. தனது மனைவியை கோகுல் அபகரித்துக் கொண்டதைத் தெரிந்த அவர் ஆத்திரத்தின் உச்சிக்கே சென்றார்.
அதனால் அடிக்கடி கோகுலுக்கும் விஜயகுமாருக்கும் தகராறு ஏற்பட்டு வந்தது. இந்நிலையில், விநாயகர் சதுர்த்தி விழாவில் விஜயகுமாருக்கும், கோகுலின் நண்பர் அருண் ராஜுக்கும் மோதல் ஏற்பட்டு கைகலப்பாக மாறியது. மனைவியை அபகரித்துக்கொண்ட கோகுல் தன் நண்பன் மீது கை வைத்ததும் இனியும் அவரை விட்டுவைக்கக் கூடாது என விஜயகுமார் முடிவெடுத்தார்.
கோகுலை கொலை செய்ய வேண்டும் என்று திட்டமிட்டவர் பயங்கர ஆயுதங்களை எடுத்துக்கொண்டு நண்பர்களுடன் கைகோர்த்தார். இரவில் ஆள் நடமாட்டம் இல்லாத நேரம் பார்த்து கோகுலின் வீட்டிற்குச் சென்று அவரை சரமாரியாகத் தாக்கியது விசாரணையில் தெரியவந்தது.
இச்சம்பவம் தொடர்பாக வழக்குப்பதிவு செய்த காவல் துறையினர், விஜயகுமார், அருண்ராஜ், ஜெய்கிருஷ்ணன் உள்ளிட்ட நான்கு பேரை பிடித்து தாம்பரம் நீதிமன்றத்தில் ஆஜர் படுத்தி சிறையில் அடைத்தனர். மேலும், சம்பவத்தில் தொடர்புடைய தலைமறைவாக இருக்கும் சரவணன் என்பவரை தேடி வருகின்றனர்.
இதையும் படிங்க: ஈரோடு அருகே காட்டாற்று வெள்ளத்தில் சிக்கிய அரசுப்பேருந்து!
