இந்தியாவுடனான வர்த்தகம் - அமெரிக்கா முதல் இடம்!

டெல்லி: இந்தியாவுடன் அதிகளவில் வர்த்தகம் செய்யும் நாடுகளில் அமெரிக்கா முதல் இடத்தில் தொடர்வதாக மத்திய வர்த்தக அமைச்சகம் தெரிவித்துள்ளது.

இந்தியாவுக்கும் அமெரிக்காவுக்குமான வர்த்தகம் கடந்த சில ஆண்டுகளாகவே தொடர்ந்து அதிகரித்துவருகிறது. இரு நாடுகளுக்கும் இடையேயான வர்த்தக உடன்பாட்டில் அவ்வப்போது சிறு பூசல்கள் வந்தாலும், அவை விரைவாக களையப்பட்டு வர்த்தகம் எவ்வித சிக்கலுமின்றி தொடர்ந்து நடைபெற்று வருகிறது.

இந்நிலையில், 2019-20ஆம் ஆண்டு இந்தியாவுடன் அதிகளவில் வர்த்தகம் செய்யும் நாடுகளில் அமெரிக்கா முதல் இடத்தில் தொடர்வதாக மத்திய வர்த்தக அமைச்சகம் தெரிவித்துள்ளது. இது குறித்து வர்த்தக அமைச்சகம் வெளியிட்டுள்ள செய்திக்குறிப்பில், கடந்த 2019-20ஆம் ஆண்டு இந்தியாவுக்கும் அமெரிக்காவுக்குமான இரு தரப்பு வர்த்தகம் 88.75 பில்லியன் டாலர்களாக இருந்ததாக தெரிவிக்கப்பட்டுள்ளது. கடந்த 2018-19ஆம் ஆண்டில் இரு நாடுகளுக்கிடையே நடைபெற்ற வர்த்தகம் என்பது 87.96 பில்லியன் அமெரிக்க டாலர்களாக இருந்தது.

இந்தியாவுடன் வர்த்தக உபரி உள்ள வெகு சில நாடுகளில் ஒன்றாக அமெரிக்கா உள்ளது. இரு நாடுகளுக்கிடையிலான வர்த்தக இடைவெளி என்பது 2018-19ஆம் ஆண்டில் 16.86 பில்லியன் அமெரிக்க டாலர்களிலிருந்து, 2019-20ஆம் ஆண்டு 17.42 பில்லியன் அமெரிக்க டாலர்களாக உயர்ந்துள்ளது என்றும் தெரிவிக்கப்பட்டுள்ளது.

2018-19 ஆம் ஆண்டில், முதன்முதலில் சீனாவை பின்னுக்கு தள்ளி அமெரிக்கா இந்தியாவின் மிகப் பெரிய வர்த்தக கூட்டாளியாக மாறியது. இந்தியாவுக்கும் சீனாவுக்கும் இடையிலான இருதரப்பு வர்த்தகம் என்பது 2018-19ஆம் ஆண்டில் 87.8 பில்லியன் அமெரிக்க டாலர்களிலிருந்து, 2019-20ஆம் ஆண்டு 81.87 பில்லியன் அமெரிக்க டாலர்களாக குறைந்துள்ளது.

அதேபோல, இரு நாடுகளுக்குமிடையேயான வர்த்தக இடைவெளியும் (2018-19) 53.57 பில்லியன் அமெரிக்க டாலர்களிலிருந்து (2019-20) 48.66 பில்லியன் டாலராக குறைந்துள்ளது.

2013-14ஆம் ஆண்டு முதல் 2017-18ஆம் ஆண்டு வரை இந்தியாவின் மிகப் பெரும் வர்த்க கூட்டாளியாக சீனா இருந்தது. சீனாவுக்கு முன்பு ஐக்கிய அரபு அமீரகம் நாட்டின் மிகப் பெரும் வர்த்தக கூட்டாளியாக இருந்தது குறிப்பிடத்தக்கது.

சீனா மீதான சார்புநிலையை குறைக்க, இந்தியா அவ்வப்போது தரக் கட்டுப்பாடு உள்ளிட்ட விதிமுறைகளை கடுமையாக்கிவருகின்றன. மேலும், அமெரிக்காவுடனான இந்திய உறவு என்பது சுமுகமாக இருப்பதால், அடுத்த சில ஆண்டுகளுக்கு இந்தியாவின் மிகப் பெரிய வர்த்தக கூட்டாளியாக அமெரிக்காவே தொடரும் என்று துறைசார் வல்லுநர்கள் கருத்து தெரிவித்துள்ளனர்.

இதையும் படிங்க: 12ஆவது வாரத்தில் 13ஆவது முதலீட்டை பெற்றுள்ள ஜியோ