கோவிட்-19 பரவல் காரணமாக அமல்படுத்தப்பட்ட ஊரடங்கால் இந்தியப் பொருளாதாரம் கடுமையாக பாதிக்கப்பட்டுள்ளது. இந்தப் பாதிப்புகளை மீட்க ரூ.20 லட்சம் கோடி மதிப்பில் தற்சார்பு இந்தியா என்ற பொருளாதார ஊக்குவிப்பு திட்டத்தை பிரதமர் நரேந்திர மோடி அறிவித்தார்.
மத்திய அரசு மேற்கொண்டுள்ள பல்வேறு நடவடிக்கைகள் காரணமாக, நுகர்வோர் நம்பிக்கை ஜூலை மாதம் மேம்பட்டுள்ளதாக ரீஃபினிட்டிவ்-இப்சோஸ் முதன்மை நுகர்வோர் உணர்வுக் குறியீட்டில் (Refinitiv-Ipsos Primary Consumer Sentiment Index) தெரிவிக்கப்பட்டுள்ளது.
அதன்படி ஜூலை மாத்திற்கான இந்திய நுகர்வோர் உணர்வுக் குறியீடு 2.6 விழுக்காடு வரை உயர்ந்துள்ளது. கடந்த ஜூன் மாதம், இந்தக் குறியீடு 0.4 விழுக்காடு வரை ஏற்றம் கண்டிருந்தது குறிப்பிடத்தக்கது. முன்னதாக, கரோனா பரவல் காரணமாக அமல்படுத்தப்பட்ட ஊரடங்கால் நுகர்வோர் உணர்வுக் குறியீடு ஏப்ரல், மே மாதங்களில் பெரும் சரிவைச் சந்தித்திருந்தது.
அதேபோல பி.சி.எஸ்.ஐ.-இன் வேலைவாய்ப்பு நம்பிக்கை குறியீடு 0.7 விழுக்காடும், பொருளாதார எதிர்பார்ப்பு குறியீடு 4.9 விழுக்காடும் உயர்ந்துள்ளது. மேலும், பி.சி.எஸ்.ஐ.-இன் முதலீட்டு நம்பகதன்மை குறியீடு 2.1 விழுக்காடும் தனிப்பட்ட நிதி நிலைமைகளுக்கான குறியீடு 2.2 விழுக்காடும் அதிகரித்துள்ளது.
இது குறித்து பி.சி.எஸ்.ஐ.இன் தலைமை செயல் அலுவலர் அமித் அதர்கர் கூறுகையில், "ஊரடங்கில் தற்போது அறிவிக்கப்பட்டுள்ள தளர்வுகள் நுகர்வோர் மத்தியில் நம்பிக்கையை அதிகரித்துள்ளது. மேலும், இது பொருளாதாரம், வாழ்வாதாரம் ஆகியவற்றை மீண்டும் இயல்பு நிலைக்கு திரும்ப ஊக்கமளிக்கிறது.
மத்திய மாநில அரசுகள் பொருளாதார நடவடிக்கைகளை எச்சரிக்கையுடன் மீண்டும் தொடங்குகிறது. இது இயல்புநிலையை மீட்டெடுக்க உதவும். எங்கள் ஆய்வுகள் நகர்ப்புற நுகர்வோரின் மனநிலையை பிரதிபலிக்கிறது. அரசின் நடவடிக்கைகள் அவர்களுக்கு சிறு ஊக்கத்தை அளிக்கிறது.
கோவிட்-19 பெருந்தொற்று தொடர்ந்து அதிகரித்துவருகிறது. பொதுமக்கள் வைரஸுடன் வாழ கற்றுக்கொள்கிறார்கள். இருப்பினும், வேலைவாய்ப்புகள் குறித்த நம்பிக்கை பொதுமக்களிடையே அதிகரிக்கவில்லை" என்றார்.
இதையும் படிங்க: ஒப்பந்தங்களின் அடிப்படையில் சர்வதேச விமானப் போக்குவரத்து!
