வெஸ்ட் இண்டீஸ் - வங்கதேசம் அணிகளுக்கு இடையேயான உலகக்கோப்பை ஒருநாள் கிரிக்கெட் தொடரின் 23ஆவது லீக் போட்டி டவுன்டனில் நடைபெற்றது.இப்போட்டியில், டாஸ் வென்ற வங்கதேச அணி முதலில் பந்துவீச்சை தேர்வுசெய்தது. இதைத்தொடர்ந்து, முதலில் பேட்டிங் செய்த வெஸ்ட் இண்டீஸ் அணி எட்டு விக்கெட்டுகள் இழப்புக்கு 321 ரன்களை குவித்தது.
இதையடுத்து, 322 ரன்கள் இலக்குடன் ஆடிய வங்கதேச அணியின் தொடக்க வீரர்கள் சவுமியா சர்கார், தமிம் இக்பால் ஆகியோர் நல்ல தொடக்கத்தைத் தந்தனர். இந்த ஜோடி 52 ரன்கள் சேர்த்த நிலையில், சவுமியா சர்கார் 29 ரன்களில் ஆட்டமிழந்தார். அவரைத் தொடர்ந்து வந்த ஷகிப் அல் ஹசன், தமிம் இக்பால் உடன் சேர்ந்து சிறப்பாக ஆடி ரன்களை உயர்த்தினார். ஒருபக்கம் தமிம் இக்பால், முஷ்ஃபிகுர் ரஹிம் ஆகியோர் அடுத்தடுத்து ஆட்டமிழந்தனர்.
இதனால், வங்கதேச அணி 19 ஓவர்களில் மூன்று விக்கெட்டுகளை இழந்து 133 ரன்களை எடுத்திருந்தது. இதைத்தொடர்ந்து, லிட்டான் தாஸ், ஷகிப் அல் ஹசன் ஜோடி வெஸ்ட் இண்டீஸ் அணியின் பந்துவீச்சை சிறப்பாக எதிர்கொண்டு ரன்களை எடுத்தது.
ஆட்டத்தின் தொடக்கத்தில் இருந்தே நேர்த்தியான ஷாட் ஆடிய ஷகிப் அல் ஹசன் இந்தத் தொடரில் தனது இரண்டாவது சதத்தை விளாசினார். மறுமுனையில், லிட்டான் தாஸ் தனது பங்கிற்கு அதிரடியாக ஆடினார். இவர்களின் ஆட்டத்தைக் கட்டுப்படுத்த முடியாமல் வெஸ்ட் இண்டீஸ் பந்துவீச்சாளர்கள் திணறினர்.
இறுதியில் வங்கதேச அணி 41.3 ஓவர்களில் மூன்று விக்கெட்டுகளை இழந்து 322 ரன்களை எடுத்து, ஏழு விக்கெட்டுகள் வித்தியாசத்தில் வெற்றிபெற்றது. ஷகிப் அல் ஹசன் 124 ரன்களுடனும், லிட்டான் தாஸ் 94 ரன்களுடனும் ஆட்டமிழக்காமல் களத்தில் இருந்தனர். இதன்மூலம், இந்தத் தொடரில் முதல்முறையாக 300க்கும் மேற்பட்ட ரன்களை சேஸ் செய்த அணி என்ற பெருமையை அந்த அணி பெற்றுள்ளது.
இந்தத் தொடரில் வங்கதேச அணி, இரண்டு வெற்றி, ஒரு போட்டிக்கு முடிவு இல்லை என ஐந்து புள்ளிகளுடன் ஐந்தாவது இடத்தில் உள்ளது. தென்னாப்பிரிக்கா, வெஸ்ட் இண்டீஸ் ஆகிய பெரிய அணிகளைதான் வங்கதேச அணி வீழ்த்தியது என்பது குறிப்பிடத்தக்கது.
