உலகையே அச்சுறுத்திவரும் கரோனா வைரஸ் பரவலைக் கட்டுப்படுத்தும் நோக்கில் சர்வதேச நாடுகள் பலவும் பயணக் கட்டுப்பாடுகளை விதித்துள்ளன.
இந்நிலையில், கிர்கிஸ்தான் நாட்டில் படித்துவரும் 700க்கும் மேற்பட்ட இந்திய மாணவர்கள் இந்தியா திரும்ப முடியாமல் அங்கு தவித்துவருகின்றனர்.இது குறித்து ஈடி.வி பாரத்திடம் பேசிய தமிழ்நாட்டைச் சேர்ந்த மருத்துவ மாணவி வெங்கட்ராமன் வித்யா நந்தினி கூறுகையில், "நான் 2015 ஆம் ஆண்டில் கிர்கிஸ்தானின் அஸ்மி பல்கலைக்கழகத்தில் எம்.பி.பி.எஸ்., மருத்துவப் பாடப் பிரிவில் இணைந்தேன்.
இந்த ஆண்டுடன் எனது கல்லூரி படிப்பு நிறைவுறுகிறது. என்னுடன் தமிழ்நாடு, டெல்லி, ஆந்திரா, தெலங்கானா என இந்தியாவின் பல்வேறு பகுதிகளைச் சேர்ந்த சுமார் 1000க்கு மேற்பட்ட மாணவர்கள் இங்குள்ள ஆறு மருத்துவ பல்கலைக்கழகங்களில் எம்.பி.பி.எஸ் படித்து வருகின்றனர்.
இந்நிலையில், கடந்த வாரம் வந்தே பாரத் மிஷன் மூலம் 330 மாணவர்கள் மட்டுமே இந்தியாவுக்கு திரும்பியுள்ளனர். இன்னும் இங்கே பல மாணவர்கள் சிக்கித்தவித்து வருகிறோம். ஜூலை 2, 4 ஆகிய இரு தேதிகளில் கிர்கிஸ்தானில் இருந்து இந்தியர்களை தாயகம் அழைத்துச் செல்ல இரண்டு விமானங்கள் மட்டுமே இயக்கப்பட்டன.
அதுவும், எங்கள் தரப்பிலிருந்து தொடர்ந்து கோரிக்கை வைக்கப்பட்டதை அடுத்து கிர்கிஸ்தானுக்கு இரண்டு விமானங்களை அரசு அனுப்பியது. இங்குள்ள ஒரு சில மாணவர்களுக்கு உடல்நலப் பிரச்னைகள் உள்ளன.
மேலும், நாங்கள் கல்வி பயிலும் நிறுவனங்கள் கிர்கிஸ்தானின் பின்தங்கிய பகுதிகளில் அமைந்துள்ளதால், எங்களால் வேறு தங்குமிடங்களைக் கண்டுபிடிக்க முடியவில்லை. பல பல்கலைக்கழக விடுதிகள் மாணவர்களை அந்தந்த நாடுகளுக்குத் திரும்பிச் செல்லுமாறு கோருவதால், பெண்கள் உள்பட பல மாணவர்களளும் பெரும் நெருக்கடிக்குள்ளாகி நிற்கிறோம்” என்றார்.
இது தொடர்பாக சிவில் விமான போக்குவரத்து அமைச்சக அலுவலர்களிடம் கேட்டபோது, "எதிர்வரும் நாள்களில் கிர்கிஸ்தானுக்கு கூடுதல் விமானங்கள் இயக்கப்படும். கிர்கிஸ்தானில் உள்ள இந்திய தூதரகத்தின் அலுவலர்கள், நமது மாணவர்களுடன் தொடர்பில் உள்ளனர். தூதரகம் அலுவலர்கள், அங்குள்ள நமது மாணவர்களின் பாதுகாப்பை உறுதி செய்துள்ளனர். நமது மாணவர்கள் அனைவரும் விரைவில் தாயகம் அழைத்துவரப்படுவார்கள்" எனக் கூறினார்கள்.
இதையும் படிங்க: கிர்கிஸ்தானில் சிக்கித் தவிக்கும் தமிழ்நாடு மாணவர்கள் - உதவுமா அரசு?
