ஏழை மக்களுக்கு குறைந்த வகையில் வீடுகளைக் கட்டித் தரும் வகையில் ’பிரதம மந்திரி அவாஸ் யோஜனா’ திட்டம் கடந்த 2015ஆம் ஆண்டு, பிரதமர் நரேந்திர மோடியால் தொடங்கி வைக்கப்பட்டது. பிரதம மந்திரி அவாஸ் யோஜனா - கிராமம், நகர்ப்புறம் என இருவகையாக பிரிக்கப்பட்டுள்ள இத்திட்டத்தின் நோக்கம், 2022ஆம் ஆண்டுக்குள் இரண்டு கோடி வீடுகளை வழங்குவதாகும்
இந்நிலையில், இந்தத் திட்டத்தின் கீழ் வீடு கிடைத்த பெண் ஒருவர், சிரித்த முகத்துடன் மகிழ்ச்சியாக இருக்கும் புகைப்படத்துடன் கூடிய அரசு விளம்பரம் ஒன்று, சில நாட்களுக்கு முன்னர் செய்தித்தாள்களின் முதல் பக்கத்தில் இடம்பெற்றிருந்தது. அதில், பிரதம மந்திரி அவாஸ் யோஜனா திட்டத்தின்கீழ் அப்பெண்ணுக்கு வீடு கிடைத்ததாகவும், மேலும், அவரைப் போல் 24 குடும்பங்கள் பயனடைந்துள்ளதாகவும் தெரிவிக்கப்பட்டிருந்தது.
இந்நிலையில், அந்த விளம்பரத்தில் இடம்பெற்றுள்ள மேற்கு வங்க மாநிலம், கொல்கத்தாவைச் சேர்ந்த லக்ஷ்மி தேவி எனும் பெண், விளம்பரத்தில் குறிப்பிட்டுள்ளது போல் தான் எந்த வீட்டையும் பெறவில்லை என்றும், தான் இன்னும் வாடகை வீட்டிலேயே வசித்து வருவதாகவும் தெரிவித்துள்ளார்.
மேலும், ”இந்தப் படத்தில் இருப்பது நான் தான். ஆனால் என் படத்தை யார், எப்போது எடுத்தார்கள் என்று எனக்குத் தெரியவில்லை. என்னை யாரும் புகைப்படம் எடுக்க தொடர்பு கொள்ளவில்லை, அனுமதியும் பெறவில்லை. நான் எந்த வீட்டையும் பெறவில்லை” எனத் தெரிவித்துள்ளார்.
இதையும் படிங்க: ஆமா.. அந்த ரூ.15 லட்சம் கிடைத்ததா? மம்தா பானர்ஜி
