புதுச்சேரிக்கான சட்டப்பேரவைத் தேர்தலில் காங்கிரஸுடன் திமுக கூட்டணி அமைத்துள்ளது. திமுகவுக்கு 13 தொகுதிகளிலும், காங்கிரசுக்கு 15 தொகுதிகளிலும், கூட்டணி கட்சிகளான இந்திய கம்யூனிஸ்ட், வி.சி.க கட்சிகள் தலா ஒரு தொகுதியிலும் போட்டியிடுகின்றன. அதேபோல், என்.ஆர். காங்கிரஸ் கட்சி 16 தொகுதிகளிலும், பாஜக, அதிமுக, பாமக ஆகிய கட்சிகள் சேர்ந்து 14 தொகுதிகளிலும் களம் காண்கின்றன.
அண்மையில் நாராயணசாமியின் அமைச்சரவையில் இருந்த அமைச்சர் நமச்சிவாயம், எம்.எல்.ஏக்கள் தீப்பாய்ந்தான், ஜான்குமார் உள்ளிட்டோரை தங்கள் கட்சியில் இணைத்து, காங்கிரஸ் ஆட்சியை புதுச்சேரியில் கவிழ்த்தது பாஜக. இதனால் நடக்கவிருக்கும் தேர்தலில் வென்று பாஜகவுக்குத் தக்க பாடம் புகட்ட காங்கிரஸும், புதுச்சேரியில் தனது கொடியைப் பறக்கவிட பாஜகவும் கோதாவில் குதித்திருக்கின்றன.
புதுச்சேரி கடந்த 1954ஆம் ஆண்டு நவம்பர் ஒன்றாம் தேதி, இந்தியாவுடன் ஒன்றிணைந்தது. எட்டு ஆண்டுகளுக்குப் பிறகு, அதாவது 1963இல்தான் இந்தியாவின் அதிகாரப்பூர்வ யூனியன் பிரதேசமாக புதுச்சேரி அறிவிக்கப்பட்டது.
புதுச்சேரியானது, காரைக்கால், மாஹே, ஏனாம் உள்ளிட்ட பிராந்தியங்களை உள்ளடக்கியது. புதுச்சேரியில் 23, காரைக்காலில் 5, ஏனாம், மாஹேவில் தலா ஒரு தொகுதியென அம்மாநிலத்தில் மொத்தம் 30 சட்டப்பேரவைத் தொகுதிகள் உள்ளன. அதில் 25 பொதுத்தொகுதிகள், ஐந்து தனித்தொகுதிகள். இங்கு 10 லட்சத்து 4 ஆயிரத்து 197 வாக்காளர்கள் உள்ளனர். அதில், நான்கு லட்சத்து 72 ஆயிரத்து 650 ஆண் வாக்காளர்களும், 5 லட்சத்து 31 ஆயிரத்து 431 பெண் வாக்காளர்களும், 116 மூன்றாம் பாலினத்தவர்களும் உள்ளனர்.
புதுச்சேரி 2021 சட்டப்பேரவைத் தேர்தலில் மொத்தம் 486 வேட்பாளர்கள் வேட்பு மனு தாக்கல் செய்திருந்தனர். அதில் 347 வேட்பு மனுக்கள் ஏற்றுக்கொள்ளப்பட்டு, 81 வேட்பு மனுக்கள் நிராகரிக்கப்பட்டுள்ளன. 58 வேட்புமனுக்கள் திரும்பப் பெறப்பட்டுள்ளன. இறுதியாகக் களத்திலுள்ள 324 வேட்பாளர்களில், 290 ஆண் வேட்பாளர்களும், 34 பெண் வேட்பாளர்களும் உள்ளனர். நெல்லித்தோப்பு மற்றும் ஒழுக்கரையில் அதிகபட்சமாக, 16 வேட்பாளர்களும், மாஹே மற்றும் கதிர்காமமில் குறைந்தபட்சமாக ஆறு வேட்பாளர்களும் போட்டியிடுகின்றனர்.
வேட்பாளர்களிலேயே, நெடுங்காடு (தனி) தொகுதியில் காங்கிரஸ் சார்பாக போட்டியிடும் மாரிமுத்து, அதிக வயதுடைய வேட்பாளராக இருக்கிறார். அவருக்கு வயது 78. எம்பலம் தொகுதியில் போட்டியிடும் பகுஜன் சமாஜ் கட்சியைச் சேர்ந்த அரவிந்தன், மங்கலம் தொகுதியில் போட்டியிடும் நாம் தமிழர் கட்சியைச் சேர்ந்த பாரத் கலை, நெடுங்காடுத் தொகுதியில் போட்டியிடும் நாம் தமிழர் கட்சியைச் சேர்ந்த கீதா, திருபுவானை (தனி) தொகுதியில் போட்டியிடும் நாம் தமிழர் கட்சியைச் சேர்ந்த ரஞ்சித் ஆகியோர் குறைந்த வயதுடைய வேட்பாளர்களாக இருக்கின்றனர். அவர்களுக்கு வயது 25.
மக்கள் நீதி மய்யத்தில் மூன்று பெண் வேட்பாளர்களும், அமமுகவில் இரண்டு பெண் வேட்பாளர்களும், காங்கிரஸில் இரண்டு பெண் வேட்பாளர்களூம், நாம் தமிழர் கட்சியில் 14 பெண் வேட்பாளர்களூம், இந்திய ஜனநாயக கட்சியில் ஒரு பெண் வேட்பாளரும், காங்கிரஸில் ஒரு பெண் வேட்பாளரும், தேமுதிகவில் ஒரு பெண் வேட்பாளரும், சுயேச்சையாக 10 பெண் வேட்பாளர்களும் களத்தில் இருக்கின்றனர்.
கோடீஸ்வர வேட்பாளர்களாக சுயேச்சைகள் 19 பேரும், என்.ஆர்.காங்கிரஸில் 13 பேரும், காங்கிரஸில் 12 பேரும், திமுகவில் 9 பேரும், பாஜகவில் 9 பேரும், அதிமுகவில் 4 பேரும், அமமுகவில் 3 பேரும், மக்கள் நீதி மய்யத்தில் 3 பேரும், ஐக்கிய ஜனதா தளத்தில் இரண்டு பேரும், நாம் தமிழர் கட்சியில் ஒருவரும் போட்டியிடுகின்றனர். அதேபோல், குற்றப் பின்னணி கொண்ட வேட்பாளர்கள் 54 பேரும், தீவிர குற்றப் பின்னணி கொண்ட வேட்பாளர்கள் 28 பேரும் இருக்கின்றனர்.
புதுச்சேரியில் முக்கியத் தொகுதிகளாக ஏனாம், மண்ணடிப்பேட்டை, காமராஜ் நகர், ஒர்லியாம்பேத், நெல்லித்தோப்பு ஆகிய தொகுதிகள் இருக்கின்றன. அதேபோல், கவனிக்கத்தக்க வேட்பாளர்களாக, ஏனாம் தொகுதியில் போட்டியிடும் என். ஆர். காங்கிரஸ் கட்சியின் தலைவர் ரங்கசாமி, அதே தொகுதியில் போட்டியிடும் கொல்லப்பள்ளி ஸ்ரீனிவாஸ் அசோக் (சுயேச்சையாக போட்டியிடும் இவருக்கு காங்கிரஸ் ஆதரவு தெரிவித்துள்ளது), மண்ணடிப்பேட்டையில் போட்டியிடும் பாஜகவின் நமசிவாயம், காமராஜ் நகரில் போட்டியிடும் பாஜகவை சேர்ந்த ஜான் குமார், நெல்லித்தோப்பில் போட்டியிடும் பாஜகவை சேர்ந்த ரிச்சர்ட் ஜான்குமார், ஒர்லியாம்பேத்தில் போட்டியிடும் சுயேச்சை வேட்பாளரான நேரு ஆகியோர் இருக்கின்றனர்.
பள்ளிப்படிப்பை முடித்தவர்கள் 18 வேட்பாளர்களும், பட்டப்படிப்பு முடித்தவர்கள் 47 வேட்பாளர்களும், பட்ட மேற்படிப்பு முடித்தவர்கள் 87 வேட்பாளர்களும், பட்டம் பெறாதவர்கள் 172 வேட்பாளர்களும் களத்தில் இருக்கின்றனர். புதுச்சேரியில் கடந்த 2016ஆம் ஆண்டு நடந்த சட்டப்பேரவைத் தேர்தலில், காங்கிரஸ் கட்சி 15 இடங்களையும், திமுக இரண்டு தொகுதிகளையும் கைப்பற்றியது. மேலும், சுயேச்சை ஒரு தொகுதியையும் கைப்பற்றினார். அதேபோல், என்.ஆர். காங்கிரஸ் எட்டு தொகுதிகளிலும், அதிமுக நான்கு தொகுதிகளிலும் வெற்றி பெற்றது.
காங்கிரஸ் ஆட்சி நடந்தபோது, துணை நிலை ஆளுநராக நியமிக்கப்பட்ட கிரண்பேடி, அரசை செயல்படாமல் தடுப்பதாக அவர் மீது முன்னாள் முதலமைச்சர் நாராயணசாமி தொடர்ந்து குற்றச்சாட்டு கூறிவந்தார். அதையெல்லாம் கண்டுகொள்ளாத கிரண்பேடி தொடர்ந்து பல்வேறு விஷயங்களை செய்தார். இதுகுறித்து குடியரசுத் தலைவரிடம் நாராயணசாமி புகாரளித்தார். தொடர்ந்து சர்ச்சைகள் எழ, துணை நிலை ஆளுநரை மத்திய அரசு திரும்பப் பெற்றுக்கொண்டது.
இதைத்தொடர்ந்து காங்கிரஸ் அரசின் அமைச்சரையும், எம்.எல்.ஏக்களையும் வளைத்துப்போட்டு ஆட்சியை கவிழ்த்தது பாஜக. தெலங்கானாவின் ஆளுநராக இருக்கும் தமிழிசை சௌந்தரராஜனுக்கு புதுச்சேரி மாநில துணை நிலை ஆளுநராக கூடுதல் பொறுப்பு வழங்கப்பட்டு, அங்கு அவர் துணை நிலை ஆளுநராகத் தொடர்கிறார்.
புதுச்சேரி அரசியலைப் பொறுத்தவரை காங்கிரஸ், என். ஆர். காங்கிரஸ் என, இரண்டு முகங்கள் இருக்கும் சூழலில் தற்போது புதிய முகமாக பாஜக தன்னை இணைத்துக்கொண்டுள்ளது. காங்கிரஸை கவிழ்த்த பாஜகவின் செயல்பாட்டை மக்கள் எப்படி எடுத்து கொண்டுள்ளனர் என்பது தேர்தல் முடிவுகளில் தெரிந்துவிடும்.
மாநிலத்தில் சுத்தமான குடிநீர் இல்லை, வேலை வாய்ப்பு இல்லை, மாநிலத்தின் அனைத்து தொழிற்சாலைகளும் மூடப்பட்டுள்ளன போன்ற குற்றச்சாட்டுக்களை மக்கள் முன்வைக்கின்றனர். அதுமட்டுமின்றி, புதுச்சேரியில் சுற்றுலாவை மையமாக வைத்து பல தொழில்கள் நடக்கின்றன.
அந்தத் தொழில் செய்பவர்களைப் பொறுத்தவரை, கரோனாவாலிருந்து மீண்டுவரும்போது முதலமைச்சருக்கும், ஆளுநருக்கும் மோதல் எழுந்ததால், மாநில வளர்ச்சி, பொதுமக்களின் அடிப்படை தேவைகள் பூர்த்தி செய்யப்படவில்லை என்பது பெரிய அதிருப்தியாக இருக்கிறது.
புதுச்சேரிக்கு தனி மாநில அந்தஸ்து கிடைத்தால் நன்றாக இருக்கும் என்று உணரும் அம்மாநில மக்கள், ஆளுநருக்கும், முன்னாள் முதலமைச்சருக்கும் நடந்த அதிகாரப்போட்டியால் தங்களுக்கு பொங்கலுக்கு அரிசி, பணமும் கொடுக்கவில்லை என்று வேதனை தெரிவிக்கின்றனர், முன்னாள் முதலமைச்சர் நாராயணசாமிக்கும், முன்னாள் ஆளுநர் கிரண்பேடிக்கும் நடந்த அதிகார போட்டியால் மாநிலத்தில் எந்த ஒரு வளர்ச்சி திட்டமும் செயல்படுத்தப்படவில்லை. அதன் தாக்கம் இந்தத் தேர்தலில் எதிரொலிக்கும் என்றே கருதப்படுகிறது.
