ஹைதராபாத்: நாட்டின் பல்வேறு மாநிலங்களில் கோடை வெயிலின் தாக்கம் அதிகரித்துள்ளது. பல இடங்களில் இயல்பை விட வெப்பநிலை அதிகரித்துக் காணப்படுகிறது. வெப்ப அலை தாக்கி பொதுமக்கள் உயிரிழக்கும் சம்பவங்கள் நடந்து வருகின்றன.
தெலங்கானா மாநிலத்தில் கடந்த ஒரு வாரமாக கோடை வெயில் வாட்டி வதைக்கிறது. கடந்த 16ஆம் தேதி அதிகபட்சமாக 45.2 டிகிரி செல்சியஸ் வெப்பநிலை பதிவாகியிருந்தது. இது ஒரே நாளில் 1.2 டிகிரி அளவுக்கு அதிகரித்து நேற்று(மே.17) 46.4 டிகிரி செல்சியசை எட்டியது.
நேற்றைய நிலவரப்படி, பெரும்பாலும் மாநிலத்தின் அனைத்து பகுதிகளிலும் 40 முதல் 46 டிகிரி செல்சியஸ் வரை வெப்பநிலை பதிவானது. அதிகபட்சமாக ஜுலுருபாட்டில் 46.4 டிகிரி செல்சியசும், பையாரதம் என்ற இடத்தில் 45.3 டிகிரி செல்சியசும், சூர்யாபேட்டையில் 45.2 டிகிரி செல்சியசும், நல்கொண்டாவில் 45.2 டிகிரி செல்சியசும், ஜெயசங்கர் பூபாலப்பள்ளி மாவட்டத்தின் மகாதேவ்பூரில் 44.9 டிகிரி செல்சியசும் வெப்பநிலை பதிவானது.
பகலில் மட்டுமல்லாமல் இரவு நேரங்களிலும் கூட வெப்பநிலை அதிகரித்துக் காணப்படுவதால் மக்கள் கடும் சிரமத்திற்கு ஆளாகி வருகின்றனர். கடந்த 16ஆம் தேதி இரவு, ஹனுமகொண்டாவில் 31 டிகிரி செல்சியசும், கம்மத்தில் 30 டிகிரி செல்சியஸ் வெப்பநிலையும் பதிவாகியுள்ளது. இது இயல்பை விட 3.6 டிகிரி அதிகமாகும்.
இதையும் படிங்க: ஆந்திரா, தெலங்கானாவில் வெப்ப அலையின் கோரத்தாண்டவம் - தொடரும் உயிரிழப்புகள்!
இந்த கடும் வெப்பநிலை வரும் 29ஆம் தேதி வரை நீடிக்க வாய்ப்புள்ளதாக வானிலை ஆய்வு மையம் தெரிவித்துள்ளது. 43 முதல் 44 டிகிரி வரை வெப்பநிலை பதிவாகக்கூடும் என்றும், இதனால் பொதுமக்கள் எச்சரிக்கையுடன் இருக்க வேண்டும் என்றும் வானிலை மையம் அறிவுறுத்தியுள்ளது.
இது குறித்து இந்திய வானிலை ஆய்வு மையத்தின் தெலங்கானா மாநில இயக்குனர் நாகரத்னா கூறும்போது, "கடலில் அதிக வெப்பநிலை நிலவுகிறது. தென்மேற்கு பருவக்காற்றுக்கு ஏற்ற வானிலை இல்லை. இம்மாதம் 29ஆம் தேதி வரை வெயிலின் தாக்கம் நீடிக்க வாய்ப்புகள் உள்ளன. அதன் பிறகு பருவமழை உருவாக சாதகமான வானிலை அமைந்தால் ஜூன் முதல் வாரத்தில் கேரளாவில் மழை பெய்யத் தொடங்கும். அடுத்த ஒரு வாரத்திற்கு வெப்பநிலை அதிகரித்துக் காணப்படும் என்பதால், பொதுமக்கள் காலை 11 மணி முதல் மாலை 3 மணி வரை வெளியில் செல்ல வேண்டாம்" என்று தெரிவித்தார்.
தெலங்கானா மாநிலத்தில் இந்த கோடையில் வெப்ப அலை தாக்கி இதுவரை 7 பேர் உயிரிழந்துள்ளனர் என்பது குறிப்பிடத்தக்கது.
