ஷஹதோல்: கத்தாரில் நடந்து வரும் பிஃபா உலக கோப்பை கால்பந்து போட்டியை உலகம் முழுவதும் கோடிக்கணக்கான ரசிகர்கள் ரசித்து வருகின்றனர். மேலும் இந்தியாவில் கிரிக்கெட்டிற்கு பரவலாக ரசிகர்கள் இருந்து வரும் நிலையில், மத்திய பிரதேசத்தில் உள்ள பழங்குடியின கிராமத்தினர் அனைவரும் கால்பந்து ரசிகர்களாக இருந்து வருகின்றனர். அங்கு வசிப்பவர்களில் பெரும்பாலானோர் தேசிய அளவிலான கால்பந்து போட்டியில் விளையாடியவர்களாகவும் உள்ளனர்.
வீட்டுக்கொரு தேசிய கால்பந்தாட்ட வீரர்: இந்தியாவில் கிரிக்கெட் ஆதிக்கம் செலுத்தினாலும், ஷஹதோல் மாவட்டத்தில் உள்ள விச்சார்பூர் கிராமத்தில் உள்ள பெரும்பாலானோர் வீடுகளில் ஒரு தேசிய கால்பந்தாட்ட வீரர் அல்லது வீராங்கனை இருப்பதைக் காணலாம்.
இக்கிராமத்தைச் சேர்ந்த சில வீரர்கள் தேசிய அளவிலான கால்பந்தாட்ட போட்டிகளில் ஓரிரு முறை அல்ல 10 முதல் 12 முறை விளையாடி உள்ளனர். இங்கு பெண்கள், சிறுவர்கள் என 25 முதல் 30 தேசிய கால்பந்து வீரர்கள் உள்ளனர். இதில் பெண்களின் எண்ணிக்கை அதிகம் என்பது குறிப்பிடத்தக்கது.
பயிற்சியாளர் யசோதா சிங்: விசார்பூர் கிராமத்தில் வசிக்கும் யசோதா சிங் அங்குள்ள சிறுவர், சிறுமிகளுக்கு கால்பந்து பயிற்சி அளித்து வருகிறார். இவர் 6 முறை தேசிய அளவிலான போட்டிகளில் விளையாடியுள்ளார்.
லட்சிமி என்ற வீராங்கனையும் 9 முறை தேசிய அணியில் விளையாடியுள்ளார். இங்குள்ள வீரர்கள் இவ்வளவு சாதனைகள் புரிந்தும், அவர்களுக்கான பலன் எதுவும் கிடைக்கவில்லை. விளையாட்டில் வெற்றி பெற்றதற்கான சான்றிதழ், பதக்கங்களை தவிர கூடுதலாக எந்த சலுகையும் கிடைக்கவில்லை என குற்றம்சாட்டுகின்றனர்.
பயிற்சியாளர் யசோதா சிங் கூறுகையில் இந்த போட்டிகளால் எங்கள் வாழ்க்கைக்கு எந்த உபயோகமும் இல்லை’ என்றார்.
இருப்பினும் கால்பந்து மீதான ஆர்வத்தால் இக்கிராமத்தில் வசிக்கும் குழந்தைகள் முதல் வயதானவர்கள் வரை கால்பந்து விளையாட்டை உற்சாகமாக ஆடி வருகின்றனர். இத்தகைய பழங்குடியின கிராமத்தில் இருந்து வரும் வீரர், வீராங்கனைகளை ஊக்குவிக்க மத்திய பிரதேச அரசு உரிய நடவடிக்கை எடுக்க வேண்டும் என மக்கள் கோரிக்கை விடுத்து வருகின்றனர்.
இதையும் படிங்க:FIFA World Cup: இன்றைய போட்டிகளின் முழு விவரம்
