புதுச்சேரி மாநிலம், காமராஜர் நகர் தொகுதி பாஜக வேட்பாளர் ஜான்குமாரை ஆதரித்து நடிகை கவுதமி பரப்புரை மேற்கொண்டார். பின்னர் செய்தியாளர்களுக்கு அவர் பேட்டியளித்தார். அப்போது அவர் பேசுகையில் “பரப்புரை மேற்கொள்ளும் ஒவ்வொரு இடத்திலும் நல்ல வரவேற்பு கிடைக்கிறது. இதனால் மனம் நிறைந்திருக்கிறது.
வரப்போகும் தேர்தலில் தேசிய ஜனநாயகக் கூட்டணிக்கு அமோக வெற்றி கிடைக்கும் என்ற முழு நம்பிக்கை இருக்கிறது. தேசிய ஜனநாயகக் கூட்டணியில் உள்ள அனைத்து வேட்பாளர்களும் அமோக வெற்றி பெறுவர். பாஜக தலைவர்களின் கொள்கைகளை பார்த்து, நமது தேசத்திற்கு ஏற்ற கட்சி பாஜக தான் என 24 ஆண்டுகளுக்கு முன் பாஜகவில் இணைந்தேன். புதுச்சேரி மக்களுக்கு நியாயமான ஆட்சியை தேசிய ஜனநாயகக் கூட்டணி அளிக்கும்.
பாஜகவின் ஆட்சியால் புதுச்சேரிக்கு ஒரு நல்ல எதிர்காலம் அமையும். கேஸ், பெட்ரோல், டீசல் விலை உயர்வுக்கு பாஜக பொறுப்பல்ல. விலை உயர்வுக்கு மத்திய அரசு மட்டுமே காரணம் அல்ல, மாநில அரசுகளுக்கும் பொறுப்பு உள்ளது. இது குறித்து பொருளாதாரம், நிதித்துறை கலந்து பேசினால் தெளிவு கிடைக்கும். அது பற்றி இப்போது பேச வேண்டியதில்லை. மக்களுக்கு எல்லாம் புரிந்து விட்டது” என்றார்.
இதையும் படிங்க: திமுகவின் மிரட்டல் முதல் சீமானின் கடன்தள்ளுபடி வரை: இன்றைய தேர்தல் சரவெடிகள்
