டெல்லி: இந்த ஆண்டின் பட்ஜெட் கூட்டத்தொடர் இன்று (ஜன.31) குடியரசுத் தலைவர் உரையுடன் தொடங்கியது. மாநிலங்களவை, மக்களவையின் கூட்டுக்கூட்டத்தொடரில் தனது முதல் உரையை நிகழ்த்திய குடியரசுத் தலைவர் திரெளபதி முர்மு, “ஜம்மு காஷ்மீருக்கான சட்டப்பிரிவு 370 ரத்து, முத்தலாக் முறை ஒழிப்பு ஆகியவை மத்திய அரசின் பாரட்டத்தக்க முடிவாக உள்ளதாக நான் பார்க்கிறேன்.
உலகில் எங்கு அரசியல் மந்தம் நிலவுகிறதோ, அங்கு அந்த நாடு நிலைகுலைகிறது. ஆனால், நமது அரசின் தீர்க்கமான முடிவுகளால் மற்ற நாடுகளை ஒப்பிடுகையில், இந்தியா பல்வேறு விதங்களில் முன்னேற்றம் அடைந்து வருகிறது. மத்திய அரசின் ஜல் ஜீவன் திட்டத்தின் மூலம் கடந்த 3 ஆண்டுகளில் 11 கோடி குடும்பங்களுக்கு குழாய் வழியாக குடிநீர் வழங்கப்பட்டுள்ளது.
இது ஏழை மக்களுக்கு கணிசமான பயனை அளித்துள்ளது. மத்திய அரசின் பல்வேறு திட்டங்களால் கோடிக்கணக்கான நடுத்தர குடும்பங்கள் பயனடைந்துள்ளன. அடுத்த 25 ஆண்டுகளில் நாடு அடையவுள்ள இலக்குக்கு, மக்கள் தங்களால் இயன்றவற்றை செய்ய வேண்டும் என கேட்டுக்கொள்கிறேன்.
பிரதமர் மோடியின் 9 ஆண்டு கால ஆட்சியில், நாடு பல்வேறு முன்னேற்றங்களையும் மாற்றங்களையும் கண்டுள்ளது. ஒவ்வொரு இந்திய குடிமகனுக்கும் சுய நம்பிக்கை ஏற்பட்டுள்ளது. உலக நாடுகள் இந்தியாவை உற்று நோக்குகின்றன. ஏனென்றால் பல்வேறு நாடுகளின் பிரச்னைகளை தீர்ப்பதில் இந்தியா முக்கிய பங்கு வகிக்கிறது.
இதையும் படிங்க: எனது அரசாங்கம் எஸ்சி, எஸ்டி, ஓபிசி மக்களின் அதிகாரத்தை கட்டியெழுப்பியுள்ளது - திரௌபதி முர்மு
