கரோனா: இனி கர்ப்பிணிகளுக்கும் தடுப்பூசி

கர்ப்பிணிகளுக்குக் கரோனா தடுப்பூசி போடலாம் என்று ஐ.சி.எம்.ஆர் பொது இயக்குநர் மருத்துவர் பல்ராம் பார்கவா தெரிவித்துள்ளார். ஆனால், குழந்தைகளுக்கு இந்த நோய்க்கு எதிராக தடுப்பூசி போட முடியுமா என்பதை தீர்மானிக்க கூடுதல் தரவுகள் தேவைப்படுகிறது என்றும் கூறினார்.

டெல்லி: இந்தியாவில் கரோனா தொற்றுக்கு எதிராக கோவாக்சின், கோவிஷீல்ட் ஆகிய இரண்டு தடுப்பூசிகள் பெருமளவில் பொதுமக்களுக்கு செலுத்தப்படுகின்றன.

முன்னதாக, இந்த இரண்டுமே கர்ப்பிணிகளிடம் செலுத்திப் பரிசோதிக்கப்படவில்லை என்பதால், மத்திய அரசு இவர்களுக்கு இந்த தடுப்பூசிகளை பரிந்துரை செய்யாமல் இருந்தது.

இந்நிலையில் இதுகுறித்து நேற்று(ஜூன் 25) நடந்த பத்திரிகையாளர் சந்திப்பில் ஐ.சி.எம்.ஆர் பொது இயக்குநர் பல்ராம் பார்கவாவிடம், குழந்தைகள் மற்றும் கர்ப்பிணிகளுக்கு எப்போது தடுப்பூசி போடப்படும் எனக் கேள்வி முன்வைக்கப்பட்டது.

அப்போது பதிலளித்த பல்ராம் பார்கவா, 'கர்ப்பிணிகளுக்குத் தடுப்பூசி போடும் முடிவை எடுப்பதற்கு முன்பு ஐ.சி.எம்.ஆர் ஆய்வகத்தில் சோதனை செய்ததில், கர்ப்பிணிகளுக்குத் தடுப்பூசி போட்டால் பயனுள்ளதாக இருக்கும் என்றும், அது வழங்கப்பட வேண்டும் என்பதையும் நிரூபித்தோம். இதனால், இனி கர்ப்பிணிகளுக்குக் கரோனா தடுப்பூசியை வழங்கலாம் என சுகாதார அமைச்சகம் வழிகாட்டுதல்களை வெளியிட்டுள்ளது.

ஆனால், போதுமான தகவல்கள் கிடைக்கும் வரை குழந்தைகளுக்கு கரோனா தடுப்பூசி தேவையா என்பது இன்னும் விவாதத்திற்குரிய கேள்வியே.

உலகில் குழந்தைகளுக்குத் தடுப்பூசி செலுத்தும் ஒரே நாடு அமெரிக்கா. இருப்பினும், குழந்தைகளுக்கு ஊசி செலுத்தப்பட வேண்டுமா என்பது இன்னும் கேள்விக்குறியாகவே உள்ளது.

இன்னும் குழந்தைகளுக்கு செலுத்தவேண்டிய தடுப்பூசி குறித்து, போதுமான தகவல்கள் நம்மிடம் இல்லை. இருப்பினும், 2 முதல் 18 வயதிற்குட்பட்ட குழந்தைகளுக்குத் தடுப்பூசி செலுத்துவது தொடர்பான ஆய்வுகள் நடைபெற்று வருகின்றன.

அதனுடைய முடிவுகள் வரும் செப்டம்பர் - அக்டோபர் மாதங்களில் கிடைக்கலாம். அதன்பின்பு முடிவுகள் அறிவிக்கப்படும். எது எப்படி இருப்பினும், துறைசார் வல்லுநர்கள் குழந்தைகளுக்குத் தடுப்பூசி தேவையா என்பது குறித்து விவாதித்து வருகின்றனர்.

மேலும் அமெரிக்காவில் குழந்தைகளுக்குத் தடுப்பூசி செலுத்தியதில், சில சிக்கல்கள் இருப்பதை அறிய முடிகிறது' என்றார்.