புனே : கடந்த 9 ஆண்டுகளில் 4 கோடிக்கும் அதிமான வீடுகளை கட்டிக் கொடுக்கப்பட்டு உள்ளதாக பிரதமர் மோடி தெரிவித்தார். பல்வேறு நிகழ்ச்சிகளில் பங்கேற்கவும், முடிவடைந்த மற்றும் பல்வேறு திட்டங்களுக்கு அடிக்கல் நாட்டவும் ஒருநாள் பயணமாக பிரதமர் மோடி இன்று (ஆகஸ்ட். 1) மகாராஷ்டிராவின் புனே நகருக்கு சென்றார்.
பிரதமர் மோடிக்கு லோகமான்ய திலக் தேசிய விருது வழங்கப்பட்டது. இந்த விருது வழங்கும் விழாவில் மகாராஷ்டிர முதலமைச்சர் ஏக்நாத் ஷிண்டே, துணை முதலமைச்சர்கள் தேவேந்திர பட்னவிஸ், அஜித் பவார், தேசியவாத காங்கிரஸ் கட்சியின் மூத்த தலைவர் சரத் பவார் உள்ளிட்டோர் கலந்து கொண்டனர்.
விழாவில் பேசிய பிரதமர் மோடி, "தனிப்பட்ட முறையில் நினைவு கூரத்தக்க நிகழ்வு இது. நான் உணர்ச்சிவசப்பட்ட நிலையில் இருக்கிறேன். பால கங்காதர திலகர், சுதந்திர போராட்டத்தின் திலகமாகத் திகழ்பவர். பத்திரிகை சுதந்திரத்தின் முக்கியத்துவத்தை நன்கு உணர்ந்தவர். சுதந்திரப் போராட்டத்தின் போக்கையே மாற்றியவர்.
நாட்டில் நிகழும் போராட்டங்களுக்கு எல்லாம் தந்தையாக இருப்பவர் பால கங்காதர திலகர் என்று பிரிட்டிஷ் ஆட்சியாளர்கள் அவரை கருதினர். விடுதலைப் போராட்டத்தில் முன்னணியில் நின்ற அவரது பெயரிலான விருதைப் பெற்றதை கவுரவமாகக் கருதுகிறேன். இளம் திறமையாளர்களை அடையாளம் காண்பதில் லோகமான்ய திலகர் சிறந்து விளங்கினார்.
இந்தியாவின் பயணம் என்பது நம்பிக்கை பற்றாக்குறை என்ற நிலையில் இருந்து உபரி நம்பிக்கை என்ற நிலைக்கு சென்று உள்ளது. உபரி நம்பிக்கை என்பது கொள்கைகளிலும், மக்களின் கடின உழைப்பிலும் இருப்பதைப் பார்க்க முடிகிறது. நம்பிக்கை இல்லாத இடத்தில் வளர்ச்சிக்கு இடம் இருக்காது.
தற்போது நாட்டு மக்களிடையே நம்பிக்கை அதிகரித்திருக்கிறது. கடந்த 9 ஆண்டுகளில் மக்கள் நாட்டில் மிகப் பெரிய மாற்றத்தை ஏற்படுத்தி இருக்கிறார்கள். உலகின் 5வது பெரிய பொருளாதாரமாக நாட்டை அவர்கள் உயர்த்தி இருக்கிறார்கள்" என தெரிவித்தார். விழாவை தொடர்ந்து புனே நகரின் இரண்டு வழித்தடங்களில் கட்டி முடிக்கப்பட்ட மெட்ரோ ரயில் சேவையை பிரதமர் மோடி தொடங்கி வைத்தார்.
பின்னர், சிவாஜி நகர் காவல்துறை தலைமையகத்தில் வீடு கட்டும் திட்டம் உள்பட பல்வேறு வளர்ச்சித் திட்டங்களுக்கு பிரதமர் அடிக்கல் நாட்டினார். புனே நகரில் வாழும் நடுத்தர மக்களின் வாழ்க்கைத் தரத்தை உயர்த்த வேண்டும் என்பதில் அரசு மிகவும் தீவிரமாக இருப்பதாகவும் அதைக் கருத்தில் கொண்டு 15 ஆயிரம் கோடி ரூபாய் மதிப்பீட்டில் வீடு கட்டும் திட்டத்திற்கான அடிக்கல் நாட்டப்பட்டு உள்ளதாகவும் பிரதமர் மோடி தெரிவித்தார்.
கடந்த 9 ஆண்டுகளில் 4 கோடிக்கும் அதிமான வீடுகளை மத்திய அரசு கட்டிக் கொடுத்திருப்பதாகவும் அப்படி வழங்கப்பட்டு உள்ள வீடுகளில் பெரும்பாலானவை பெண்களின் பெயர்களில் பதிவு செய்யப்பட்டுள்ளதாகவும் பிரதமர் மோடி கூறினார். ரயில்வே துறையை மேம்படுத்த மத்திய அரசு அதிக முன்னுரிமை கொடுத்து வருவதாகவும் அதன் ஒரு அங்கமாகவே, தற்போது புனே மெட்ரோ ரயில் சேவை தொடங்கப்பட்டுள்ளதாக பிரதமர் கூறினார்.
2014க்கு முந்தைய 10 ஆண்டுகளோடு ஒப்பிடுகையில், ரயில்வே மேம்பாட்டுக்காக 12 மடங்கு கூடுதல் நிதியை மத்திய அரசு ஒதுக்கி இருப்பதாக பிரதமர் மோடி தெரிவித்தார்.
இதையும் படிங்க : பீகாரில் சாதிவாரி கணக்கெடுப்புக்கு அனுமதி... பாட்னா உயர் நீதிமன்றம் அதிரடி!
