மாரி செல்வராஜ் இயக்கத்தில் தனுஷ் நடிப்பில் உருவாகியுள்ள படம் 'கர்ணன்'. இதில் ரெஜிஷா விஜயன், யோகிபாபு, லால் உள்ளிட்டோர் நடித்துள்ளனர்.
சந்தோஷ் நாராயணன் இசையில் படத்தின் பாடல்கள் அனைத்தும் ரசிகர்கள் மத்தியில் நல்ல வரவேற்பைப் பெற்றுள்ளன. சமீபத்தில் வெளியான இந்தப் படத்தின் டீசர் படம் குறித்தான எதிர்பார்ப்பை வெகுவாக அதிகரித்துள்ளது. நாளை (ஏப்.09) கர்ணன் திரைப்படம் தமிழ், மலையாளம் ஆகிய மொழிகளில் வெளியாகிறது.
இந்நிலையில், புதுச்சேரி தனுஷ் ரசிகர் மன்றத்தினர் கர்ணன் படத்திற்கான பேனரை புதுச்சேரி துறைமுகத் தூண்களில் கட்டி பொதுமக்கள் பார்வையில் படும்படி வைத்துள்ளனர்.
புதுச்சேரி காந்தி சிலை பின்புறம், பிரெஞ்சு கால ஆட்சிக்காலத்தின்போது கட்டப்பட்ட இந்தத் துறைமுகம் நாளடைவில் பழுதடைந்து முற்றிலும் சேதம் அடைந்து தற்போது இரும்புத் தூண்களாக காட்சியளிக்கின்றது. கடலில் உள்ள இந்தத் துறைமுகத் தூண்களில் கடந்த 20 ஆண்டுகளாக ஒவ்வொரு கட்சியினரும் தங்கள் தலைவர்களின் படங்களை வைத்தும், புதிய திரைப்படம் வரும்போது நடிகர்களின் பேனர்களை இதுபோன்று வைத்தும் மின்விளக்குகளால் அலங்கரித்து வருவதை வாடிக்கையாகக் கொண்டுள்ளனர்.
இதையும் படிங்க: உங்க கர்ணனாக என்ன மாத்துனத்துக்கு நன்றி மாரி - தனுஷ்
