ஜெய்ப்பூர்: ராஜஸ்தானின் நாகௌர் மாவட்டத்தைச் சேர்ந்த சுரேஷ் பிச்சார் என்ற 24 வயது இளைஞர் சிகார் மாவட்ட மைதானத்தில் இருந்து தொடர் ஒட்டத்தை மேற்கொண்டார். அங்கிருந்து, மார்ச் 29ஆம் தேதி இரவு 9 மணி தனது ஓட்டத்தை தொடங்கிய சுரேஷ், ஏப். 2ஆம் தேதி மாலை 6 மணியளவில் டெல்லியை வந்தடைந்தார்.
350 கி.மீ., 50 மணிநேரத்தில் ஓடி வந்த இளைஞன் கையோடு, நாகௌர் எம்பி ஹனுமன் பெனிவாலை சந்தித்து கோரிக்கை மனு ஒன்றை கொடுத்தார். ராணுவ ஆள்சேர்ப்பு தாமதாகி வரும் நிலையில், இதுகுறித்த பிரச்சனை தீர்க்கக்கோரி அந்த மனுவில் குறிப்பிட்டுள்ளார்.
இதுகுறித்து, பெனிவால் தனது பேஸ்புக் பதிவில்,"தொடர்ந்து தாமதாகும் ராணுவ ஆள்சேர்ப்பை உடனடியாக நடத்தக்கோரி, சுரேஷ் கோரிக்கை மனு அளித்துள்ளார். இந்த பிரச்சனையை மக்களவையில் பலமுறை எழுப்பியுள்ளேன். இதற்காக தொடர்ந்து போராடுவேன்" என குறிப்பிட்டுள்ளார்.
யார் இந்த சுரேஷ்?: 1 மணிநேரத்திற்கு 6 கி.மீட்டரை கடக்க வேண்டும் என்ற திட்டமிடலுடன் ஓடியுள்ளார். இதே வேகத்தில் வந்த சுரேஷை, அவரது நண்பர்கள் காரில் பின்தொடர்ந்துள்ளனர். 50 மணிநேர ஓட்டத்தில் ஒருமுறை மட்டுமே அவர் உணவு அருந்தியுள்ளார். மேலும், அவருக்கு ஓய்வு எடுக்க வேண்டிய இடங்களை அந்தந்த பகுதிகளில் வேலையில்லாமல் தவிக்கும் இளைஞர்கள் ஏற்பாடு செய்துள்ளது குறிப்பிடத்தக்கது.
சுரேஷ், சிகாரில் உள்ள ராணுவ அகாதமியில் பயிற்சி பெற்று வருகிறார். இவர் கடந்த 2015ஆம் ஆண்டில் ராணுவத்தில் சேர வேண்டும் என வேட்கையுடன் இருந்துள்ளார். இருப்பினும், இவரின் கனவு சில காரணங்களால் தொடர்ந்து தாமதமாகி வந்தது.
மத்திய அரசு கூறும் காரணம்: சுரேஷின் தற்போதைய ஓட்ட சாதனை ராஜஸ்தான் முழுவதும் பேசப்பட்டு வரும் நிலையில், அவர் இதற்கு முன்னரும் பல சாதனைகளை புரிந்துள்ளார். 2018இல் நாக்பூரில் நடந்த ராணுவ ஆள்சேர்ப்பு தேர்வின்போது, 1600 மீட்டரை 4 நிமிடம் 4 விநாடிகளில் கடந்து சாதனை படைத்துள்ளார்.
ராணுவ ஆள்சேர்ப்பு பிரச்சனை என்பது கடந்த சில மாதங்களாக இருந்து வருகிறது. இதுகுறித்து, நாடாளுமன்றத்தின் இரு அவைகளிலும் பல முறை கேள்வி எழுப்பப்பட்டுள்ளது. கரோனா தொற்று காரணமாக 2020, 2021ஆம் ஆண்டுகளுக்கான ராணுவ ஆள்சேர்ப்பு ஒத்திவைக்கப்பட்டதாக ஒன்றிய அரசு தெரிவித்துள்ளது குறிப்பிடத்தக்கது.
இதையும் படிங்க: பிரபல தொழிலதிபருக்கு நேர்ந்த கதி; வீட்டின் முன் துப்பாக்கிச்சூடு - சிசிடிவி காட்சி
