பெங்களூரு: கர்நாடக சட்டப்பேரவை தேர்தலுக்கான பாஜக மேலிட இணை பொறுப்பாளராக தமிழ்நாடு பாஜக தலைவர் அண்ணாமலையை நியமனம் செய்யப்பட்டுள்ளார். இவரது நியமனம் தேசிய அரசியலில் கவனம் பெற்றுள்ளது. கர்நாடகாவில் பாஜக தலைமையிலான ஆட்சி நடைபெற்று வருகிறது. இந்தாண்டு மே மாதத்துக்குள் சட்டப்பேரவைத் தேர்தல் நடைபெற இருப்பதால், அதற்கான பணிகளில் பாஜக, காங்கிரஸ் கட்சி தொடங்கிவிட்டன.
அதேபோல், அரவிந்த் கெஜ்ரிவாலின் ஆம் ஆத்மியும் இந்தமுறை கர்நாடக தேர்தலில் களமிறங்குகிறது. காங்கிரஸ் எம்பி ராகுலின் பாரத் ஜோடோ யாத்திரை கர்நாடக சட்டப்பேரவை தேர்தலில் நிச்சயம் தாக்கத்தை ஏற்படுத்தும் என்று காங்கிரஸ் தலைவர்கள் நம்பிக்கை தெரிவிக்கின்றனர். அதேபோல், பாஜக தனித்து போட்டியிட்டு மீண்டும் வெல்லும் என்று உள்துறை அமைச்சர் அமித் ஷா தெரிவித்துள்ளார்.
தமிழ்நாடு பாஜக தலைவர் அண்ணாமலை கர்நாடகாவில் 8 ஆண்டுகளாக ஐபிஎஸ் பதவியில் பணியாற்றினார். அதன்பின் பதவியை ராஜினாமா செய்துவிட்டு தமிழ்நாடு பாஜகவில் இணைந்தார். அடுத்த சில மாதங்களில் பாஜக மாநில தலைவராக பொறுப்பேற்றார். அவர் பொறுப்பேற்றதில் இருந்து பாஜகவை வளர்ப்பதற்கு பல கடுமையான முயற்சியை மேற்கொண்டு வருகிறார்.
ஈரோடு கிழக்கு தொகுதி இடைத்தேர்தல் நடைபெற உள்ள நிலையில், பல வியூகங்களை அண்ணாமலை வகுத்துள்ளதாக கூறப்படுகிறது. ஏப்ரல் மாதத்தில் தமிழ்நாடு முழுவதும் பாதையாத்திரை செல்ல திட்டமிட்டிருந்த நிலையில், கார்நாடக தேர்தல் பொறுப்பாளராக நியமிக்கப்பட்டுள்ளார்.
இந்த கர்நாடக தேர்தல் பொறுப்பாளர் நியமனம் குறித்து பேசிய அண்ணாமலை, "கர்நாடக தேர்தல் பொறுப்பாளராக நியமனம் செய்யப்பட்டிருப்பது மகிழ்ச்சி அளிக்கிறது. இது என்னுடைய வேலை பழுவை அதிகரிக்கிறது. இந்த பொறுப்பு காரணமாக எனது பாதையாத்திரை குறித்து பின்னர் முடிவு செய்யப்படும்" எனத் தெரிவித்தார்.
இதுகுறித்து பாஜக தேசிய பொதுச் செயலாளர் அருண் சிங் வெளியிட்டிருக்கும் அறிக்கையில், "கர்நாடக சட்டப்பேரவைத் தேர்தலில் மத்திய கல்வியமைச்சர் தர்மேந்திர பிரதானை பாஜக மாநில பொறுப்பாளராகவும், தமிழ்நாடு பாஜக மாநில தலைவர் அண்ணாமலையை இணை பொறுப்பாளராகவும் அக்கட்சியின் தேசிய செயலாளர் ஜே.பி. நட்டா நியமனம் செய்துள்ளார். இந்த நியமனம் உடனடியாகச் செயல்பாட்டுக்கு வருகிறது" எனக் குறிப்பிடப்பட்டுள்ளது.
இதையும் படிங்க: உலக தலைவர்களில் பிரதமர் நரேந்திர மோடிக்கு முதலிடம்
