இது என்ன ஜனநாயக நாடா? தொல். திருமாவளவன் கேள்வி

புதுச்சேரி: டெல்லி வன்முறை சம்பவத்துக்கு கண்டனம் தெரிவித்த தொல். திருமாவளவன் இது ஜனநாயக நாடா என்றும் கேள்வியெழுப்பினார்.

டெல்லி வன்முறையை கண்டித்து விடுதலை சிறுத்தைகள் கட்சி சார்பில் புதுச்சேரி தலைமை தபால் நிலையம் அருகே கண்டன ஆர்ப்பாட்டம் நடைபெற்றது.

ஆர்ப்பாட்டத்துக்கு திருமாவளவன் தலைமை தாங்கினார். ஆர்ப்பாட்டத்தில் மக்களவை உறுப்பினர் ரவிக்குமார் உள்பட 500க்கும் மேற்பட்டவர்கள் கலந்து கொண்டனர்.

ஆர்ப்பாட்டத்தில் தொல்.திருமாளவன் கூறுகையில், “டெல்லியில் பாஜக குண்டர்கள் செய்தது போல், நாம் செய்தால் காவல் துறை வேடிக்கை பார்க்குமா? இது என்ன ஜனநாயக நாடா?

டெல்லியில் நடந்திருப்பது ஒரு ஒத்திகை தான். கொடூர வன்முறையை மோடி அரசு கட்டவிழ்த்திருப்பது எதற்காக என தெரியவில்லை.

டெல்லி வன்முறைக்கு பொறுப்பேற்று மோடி அமித் ஷா ஆகியோர் பதவி விலக வேண்டும். பாஜக தலைவர்களின் தேசிய பாதுகாப்பு சட்டத்தின் கீழ் கைது செய்ய வேண்டும்” என்றார்.

இதையும் பார்க்க : ’சிஏஏ குறித்து முழுமையாக அறிந்துகொண்டு பேசுங்கள்’ - வெங்கையா நாயுடு