தெலுங்கு ஊடக உலகின் முன்னோடியான ஈநாடு பத்திரிகை, ஈடிவி தொலைக்காட்சி, ரமோஜி ஃபிலிம் சிட்டி உள்ளிட்டவற்றை நிறுவியவர் ராமோஜி ராவ்.
ஊடகம், சினிமா உள்ளிட்ட பல்வேறு துறைகளில் சிறந்து விளங்கும் தொழிலதிபர் ராமோஜி ராவை ஹைதராபாத்தில் அமைந்துள்ள அமெரிக்க துணைத் தூதரகத்தின் தலைவர் ஜோயல் ரீஃப்மேன், மரியாதை நிமித்தமாகச் சந்தித்தார்.
பல்வேறு துறைகளில் முன்னோடியாக விளங்கும் ராமோஜி குழுமத்தின் செயல்பாடுகளால் ஈர்த்த ஜோயல் ரீஃப்மேன், தனிப்பட்ட முறையில் ராமோஜி ராவைச் சந்திக்க ஆர்வம் கொண்டிருந்தார்.
இந்த சந்திப்பின் போது ராமோஜி ராவ், தான் கடந்துவந்த பாதை, தொழிலில் ஏற்பட்ட சவால்களைத் தாண்டி, தனது வெற்றியின் ரகசியம் குறித்து ஜோயல் ரீஃப்மேனிடம் பகிர்ந்து கொண்டார்.
தொடர்ந்து, ஜோயல் ரீஃப்மேன் உடன் பொது விவகார அலுவலர் டிரீவ் ஜிப்லின், ஊடக ஆலோசகர் முகமது பாசித் உள்ளிட்டோர் ஃபிலிம் சிட்டி வளாகத்தில் அமைந்துள்ள ஈடிவி பாரத் செய்தி ஊடக அலுவலகத்தைப் பார்வையிட்டனர்.
13 மொழிகளில் மொபைல் செயலி மூலமாக செய்திகளை பொதுமக்களிடம் கொண்டு சேர்க்கும் இந்த புதிய அத்தியாயத்தைத் தொடங்கி வழிநடத்திச் செல்வதற்காக ராமோஜி ராவை ரீஃப்மேன் பாராட்டினார்.
மேலும், ஆயிரக்கணக்கான இளைஞர்களுக்கு வேலை வாய்ப்பு அளித்து எடுத்துக்காட்டாக விளங்குவதற்காகவும் வாழ்த்து தெரிவித்தார்.
ஈடிவி பாரத் செய்தி ஊடகத்தில் பணியாற்றும் இளம் செய்தியாளர்களைச் சந்தித்து வாழ்த்து தெரிவித்த ரீஃப்மேன், பணி சிறக்க அறிவுரை வழங்கியதோடு, அவர்களோடு சேர்ந்து செல்ஃபியும் எடுத்துக்கொண்டார்.
மேலும், அமெரிக்காவின் திரைப்படத் தயாரிப்பாளர்கள் தங்களது திரைப்படங்களைத் தயாரிப்பதற்காக ராமோஜி ஃபிலிம் சிட்டிக்கு வருவதை மகிழ்ச்சியாக எண்ணுவார்கள் என்றும் ரீஃப்மேன் பெருமிதம் தெரிவித்தார்.
தொடர்ந்து ராமோஜி ஃபிலிம் சிட்டியைப் பார்வையிட்ட அவர், அங்கு அமைந்துள்ள 'பாகுபலி' திரைப்படத்தின் பிரமாண்ட செட் உள்ளிட்டவற்றைக் கண்டு மகிழ்ந்தார்.
