மக்களவை உறுப்பினரும் காங்கிரஸ் மூத்த தலைவருமான சசி தரூர் உட்பட 23 எழுத்தாளர்களுக்கு சாகித்ய அகாடமி விருது அறிவிக்கப்பட்டுள்ளது. 'An Era of Darkness' என்ற புத்தகத்தை சசி தரூர் எழுதியதால் அவருக்கு இந்த விருது அறிவிக்கப்பட்டுள்ளது. இதுகுறித்து சாகித்ய அகாடமியின் செயலாளர் சீனிவாசாராவ், "23 மொழிகளைச் சேர்ந்த தேர்வு குழு உறுப்பினர்கள் பரிந்துரைக்க, நிர்வாகக் குழு ஆலோசனையின்படி விருது அறிவிக்கப்பட்டுள்ளது" என்றார்.
விருதை வென்ற சசி தரூர், "இந்த விருதால் நான் கெளரவிக்கப்பட்டுள்ளேன். பெருமையும், திருப்தியும் அளிப்பதாக உள்ளது. இதை நான் எதிர்பார்க்கவில்லை. எனது முதல் புத்தகம் 1981ஆம் ஆண்டு வெளியானது. 38 ஆண்டுகளாக இலக்கியம் தொடர்பாக தேசிய அளவில் விருது பெற்றதில்லை. ஆனால், சர்வதேச அளவில் விருது பெற்றுள்ளேன்" என்றார்.
குடியுரிமை திருத்த சட்டம் குறித்து பேசிய அவர், "ஆங்கிலேயர் ஆட்சி காலத்தை இந்தியாவின் இருண்ட காலம் என நான் புத்தகத்தில் குறிப்பிட்டுள்ளேன். பாஜக அரசு நாட்டை மீண்டும் இருண்ட காலத்தில் தள்ளிவிடக் கூடாது" என்றார்.
இதையும் படிங்க: குடியுரிமை திருத்த சட்டத்தை எதிர்த்த புகழ்பெற்ற வரலாற்று ஆசிரியர் கைது!
